WASHINGTON DC - Umsekeli webandla leCitizens Coalition for Change (CCC) othunjwe mhlaka 24 ngenyanga edluleyo, uNkosazana Moreblessing Ali, utholakale efile ngoMgqibelo.
Lelibandla lithi isidumbu sakhe sitholakale eChitungwiza phakathi komthombo oduzane lomuzi womsolwa kuloludaba, uMnu Pius Jamba.
Isikhulumeli samapholisa uMnu Paul Nyathi ukufakazile lokhu njalo waveza ukuthi unina kaJamba nguye ositholileyo.
Kodwa uNyathi uthe basadingisisa ukuthi ngesikabani lesisidumbu lanxa nje isikhulumeli seCCC, uNkosazana Fadzayi Mahere, esithi sokubonakele ukuthi ngempela nguMoreblessing.
UNyathi usole ezinye iziphathamandla zeCCC esithi zethule amazwi okwethusela iziphathamandla zikahulumende kanye lamapholisa ngaloludaba.
Uxwayise uzulu ukuthi abekezele njalo wathembisa ukuthi amapholisa aqhuba yonke imizamo ayenelisayo ukuthi abophe uJamba, yena ongaziwayo ukuthi ungaphi.
Igqwetha lomndeni kamufi, uMnu Job Sikhala, oyisiphathamandla njalo seCCC, wazise ukuthi isidumbu lesi sitholakale sesonakele njalo siqunye okhalweni saba zingxenye ezimbili. Wengeze wathi amathumbu ebebotshelwe e-plastikini.
Ibandla leCCC lithi uMoreblessing wathunjwa nguJamba ngezizatho zombusazwe. Lithi umsolwa ulilunga leZanu PF. Kodwa amapholisa athi udaba lolu ngolwabantu abake bathandana olungelani lezombusazwe.
UMfundisi Useni Sibanda usisolile kakhulu isehlakalo lesi esithi abantu kumele bahlalisane kuhle batshiyane lobudlova obunje.
