Amakhansili athi azalandela isinqumo sikahulumende sokuthi kususwe bonke abathengisa impahla okungekho emthethweni emadolobheni.
Iziphathamandla zamadolobho kanye lamakhansila akhulume leStudio 7 eHarare, Mutare lakoBulawayo zithi kuqala kusasa ukududula abathengisa impahla emini lebusuku emigwaqweni okungekho emthethweni.
Uhulumende uthi abantu laba kababhadali imithelo, bangcolisa amadolobho njalo bamemethekisa imikhuhlane.
Sixoxe ngodaba lolu loNkosazana Sikhululiwe Moyo, ukhansila kaWard 17 koBulawayo oncome imizamo kahulumende eyokususa abathengisa emigwaqweni okungekho emthethweni.
UMnu. Thembelani Dube, ingcwethi kwezombusazwe ezimeleyo, uthi kumele abantu bonke belandele imithetho yamadolobho njalo abaphathi bamadolobho balungise indawo eziqondileyo zokuqhuba amabhizimusi amancane enjengokuthengisa impahla emigwaqweni.
Sixoxe njalo ngodaba lolu loNkosazana Pretty Mpofu othenga ethengisa impahla emigwaqweni othi kuyamangalisa okwenziwa nguhulumende kaMongameli Emmerson Mnangagwa.
Kodwa uMnu. Malaki Nkomo okubandla leZanu PF yena uthi kuqondile okwenziwa nguhulumende.
Forum