Umqondisi wenhlanganiso yezisebenzi emhlabeni jikelele eyeInternational Labour Organisation (ILO) uMnu. Gilbert Houngbo obesethekelela eZimbabwe okwamalanga amabili ugqibe uhambo lwakhe ngoLwesibili ngokukhuthaza uhulumende ukuthi aqinise imali yeZimbabwe Gold (ZiG) ukuze izisebenzi zithole iholo elithe xaxa.
Ekhuluma ngemva komhlangano awenze loMongameli Emmerson Mnangagwa uMnu. Houngbo uthe ukuze umnotho weZimbabwe uthuthuke kumele izisebenzi zithole iholo elingcono.
Uthe ukusetshenziswa kwemali yakuleli eyeZimbabwe Gold, ZiG, kulinyathelo elihle elingasiza kuphela nxa limali ilesisindo hatshi ukuqhubeka ilahlekelwa luhlonzi njengalokho okwenzakalayo.
Izisebenzi zikhala ngokuthi iholo lazo liphansi kakhulu, okubangelwa yikugugudeka kwemali yeZiG, yona esiwe isindo ngesilinganiso samatshumi amane lantathu ekhulwini, 43% selokhe yethulwa nguhulumende ngoMbimbitho lonyaka.
Ngalokho, uMnu. Houngbo uthe kumele uhulumende ayiqinise ukuze kusize izisebenzi zamankampani azimeleyo kanye lezikahulumende.
‘’ Sikhuthaza uhulumende we Zimbabwe ukuba aqinise imali ye ZiG ukuze izisebenzi zithole imali ethengayo okungenza ukuba umnotho uqhubeke uqhela’’
UMnu. Houngbo uqhubeke wathi kumele uhulumende anike amankampani imali yakwamanye amazwe ukuze enelisi ukuthenga imitshina yakulezinsuku ezabangela ukukhiqizwa kwempahla ethengiswa kuleli, khona athi kulakho ukuvuselela umnotho.
Uthe emhlanganweni wakhe loMongameli Mnangagwa baxoxe ngendaba ezinengi ezigoqela ukuhlonitshwa kwamalungelo ezisebenzi, ukuvuselelwa komnotho lokuba ilizwe lisebenzise imitshina yakulezinsuku okuhambela lamanye amazwe.
Ezinye inhlanganiso zezisebenzi eziphatheke emhlanganweni lo zigoqela eyeZimbabwe Congress of Trade Unions, Employer Confederation of Zimbabwe lengcitshi kwezomnotho.
Unobhala weZCTU obekulumhlangano, uMnu Kudakwske Munengiwa uthe batshele uMnangagwa ngendubo ezibhekane lezisebenzi.
‘’Sitshele uMongameli ukuba iholo lethu alithengi lutho. Sifuna ukuba indaba yama ZiG ilungiswe ukuze lathi sibe ngabantu sihlonipheke njengezisebenzi’’
Ocubungula ezenotho uMnu. Masimba Kuchera uthi uhulumende kumele aze lendlela zokuvuselela imali yeZiG.
‘’ Kumele ele Zimbabwe lenelise ukuthola imali ethe xaxa kulokho esikwembayo ngokuba singathengisi ama raw materials njalo lakulokho esikulimayo, sithembe kakhulu abathenga esikulimayo lokhu kodwa akusoze kusisize’
Umphathintambo kahulumende obona ngendaba zezisebenzi uMnu July Moyo, obesemhlanganweni lo, uthe uhulumende uzimisele ukuvuselela imali yeZimbabwe ukuze umnotho ukhuphuke.
‘’ Uhulumende uzwile konke abakhala ngakho, Umongameli wethu uyalalela njalo uzalungisa indaba zemali ukuba ithenge’’
UMnu. Houngbo, yena ofike eZimbabwe ngeSonto, ugqibe uhambo lwakhe wabuyela elizweni lakhe leTogo namuhla.
EleZimbabwe yilo elizaphatha isikhundla somqondisi weILO kusukela ekuqaleni komnyaka ka2025 ekugqitshweni komhlangano weILO conference ozakwenzelwa kuleli.
Forum