WASHINGTON DC - UMongameli Emmerson Mnangagwa uthi uzasayina umthetho olawula ukusebenza kwenhlanganiso ezizimeleyo, owePrivate Voluntary Organizations Bill lanxa ingcwethi zomanyano wamazwe omhlaba oweUnited Nations ezibona ngezamalungelo oluntu zisithi engawusayini ngoba uyancindezela njalo usephula amalungelo kazulu.
Eloba kuphephandaba leSunday Mail ngeSonto, uMnangagwa uthe kubalulekile ukuba lumthetho wethulwe ukuze kwenqatshelwe inhlanganiso ezizimeleyo athi zisebenza lezitha emizameni yokugenqula uhulumende wakhe.
“Ngizawusayina lumthetho ungavele ufike etafuleni yami,” kutsho uMnangagwa.
“Ngemva kwalokho, iZimbabwe izangena esigabeni sokubaluleka lapho okungela kugila imikhuba kundaba zombusazwe lakulabo abatshaphaza imali.
“Kade siloyisa ukusungula umthetho onje njengohulumende ukuze sivikele umphakathi, ikakhulu abantu abaswelayo kulabo abangabaphangi,” uqhubeke esitsho uMnangagwa.
Abalwela amalungelo oluntu eZimbabwe bathi uhulumende weZanu PF ufuna ukusebenzisa umthetho lo ukuvala inhlanganiso ezisola umbuso kaMnangagwa.
"Into ayikhulumayo uMnangagwa igcizelela khonokho okuvele kusaziwa ngabantu ukuthi uhulumende weZimbabwe kahloniphi mthetho, kahloniphi isisekelo sombuso, kahloniphi malungelo abantu," kutsho ingcwethi kwezombusazwe uMnu Effie Dlela Ncube.
