WASHINGTON DC - Umphathi wesikolo seFounders High koBulawayo, uNkosikazi Dorothea Moyo, uthi abafundi besikolo sakhe lezinye eziseduzane, basele behlukumezekile kakhulu ngemva kokugwazwa lokufa kumunye wabo uWayne Mgcini Ndlovu.
"Kube buhlungu kakhulu kithi ababalisi, kodwa abantwaneni it was traumatic sibili; abantwana kubathintile, bahlukuluzekile," kutsho uNkosikazi Moyo ekhuluma leStudio 7 ngoMgqibelo.
Uqhubeke wathi: "Especially, the way afe ngayo egwazwa ngesigelo, hayi kube buhlungu. abantwana bebekhala; vele from Tuesday, we never had ama-lessons with them.
"We asked for ama-counsellors within the school la-outside, to give assistance especially i-class yakhe; our first form 4 class, u-4A."
UWayne ugwazwe ngumfana oleminyaka elitshumi lasikhombisa, 17, ofunda eHamilton High ngoMvulo ngesikhathi ezama ukulamulela umngane wakhe owayehlukuluzwa ngumsolwa.
Ubeleminyaka yokuzalwa elitshumi lasithupha, 16, njalo ubekwe ngoLwesihlanu emagcwabeni eMvutshwa koBulawayo. Amapholisa athi ukuhlukuluzana kwabafundi, i-bullying, kubhahile kakhulu ezikolo zakoBulawayo.
Ngaphandle kwabantwana besikolo, ukubulawa kukaWayne kuthinte uzulu weZimbabwe jikelele kwaphehla ukukhulumisana enkundleni zokuxhumana ezifana leFacebook leTwitter ngendlela abantu abakhulisa ngayo abantwana kanye langendlela abaphathwa ngayo ngababalisi.
Kulabanye abasola ababalisi, kodwa bona basola uhulumende besithi umthetho ofakwe kuminyaka embalwa edluleyo obalisa ukutshaya abantwana yiwo owenza abanye abafundi baphenduke inyamazana babe ngumhlabi kazelusile.
Abanye njalo bathi ukungezwa kwabafundi abafana lomsolwa - yena omiswe enkantolo ngoLwesithathu esetheswa icala lokubulala - kungaba kubangela yizidakamizwa esezisetshenziswa kakhulu ngabasakhulayo, abagoqela abantwana besikolo kulesinsuku.
