GWANDA - Inengi lezakhamizi zemaphandleni emangweni weMatabeleland South lithi selisidla kanye ngelanga ngoba intengo yokudla okufana lempuphu lokunye okubalulekileyo empilweni kazulu isikhwele kakhulu ezitolo.
Lanxa uMongameli Emmerson Mnangagwa esithi akekho ozabulawa yindlala lonyaka, izakhamizi ezinengi zithi umumo usumubi njalo zithi ngabe uhulumende uhle athathe amanyathelo khathesi ngoba umangoye eselala eziko.
Zithi ukudla okufana lempuphu, itshukela, isinkwa kanye lamafutha okuphekisa sokudula okumangalisayo.
Izabelo ezibalisa iMatabeleland North, iMatabeleland South, iManicaland kanye leMasvingo kazivunanga kuhle lonyaka ngenxa yokoma komkhathi, okuzadinga ukuthi ziphathiswe ngokudla.
Sikhuluma nje, ilizwe libhekane lokusilela komumbu osokudale ukuthi abeGrain Millers Association of Zimbabwe bawuthenge kweleZambia lakweleMalawi.
