WASHINGTON DC – Umkhokheli weCitizens Coalition for Change (CCC) uMnu Nelson Chamisa ukhuthaze uzulu weMutare ngoMgqibelo ukuthi aphume ngobunengi ayevotela ibandla lakhe kukhetho lwamaby-elections oluzakwenziwa ngeviki ezayo.
Ekhulula emhlanganweni wokudinga usekelo ongenwe zinkulungwane zabantu enkundleni yeSakubva, uChamisa uthe abantu kumele babekezele nxa bengathola kulendwendwe ezinde ngosuku lokuvota ngoba ivoti inye ngayinye ibalulekile.
Usole iZanu PF esithi ilibandla lodlakela eliphehla ukuzondana kwabantu elizweni. Ngokunjalo uthe kumele lisuswe embusweni.
UChamisa wengeze wathi lanxa lelibandla lisaziwa ngodlakela, abasekeli beCCC akumelanga baphindisele kumbe labo baphatheke kundaba zodlame.
Uphinde wasola ukutshaywa komlandeli webandla lakhe uMadzibaba veShanduko, yena olaliswe esibhedlela ngemva kokubhaxabulwa kabuhlungu ngamapholisa.
NgeSonto ibandla leli lithi lizakuba lomhlangano ofanayo eMasvingo ngemva kokuphiwa imvumo ngumthethwandaba kulandela ukwaliswa kwalo ngamapholisa.
Umsekeli wesikhulumeli seCCC uMnu Felix Magalela Mafa Sibanda utshele iStudio 7 ukuthi kusobala ukuthi bazanqoba kulolukhetho.
UMongameli Emmerson Mnangagwa laye wenze owakhe umhlangano eBinga ngoMgqibelo ongenwe zinkulungwane zabalandeli bakhe. Uthembise ukuletha intuthuko kulumango, wasola njalo inhlanganiso ezizimeleyo esithi kumele zekele ukungenela kwezombusazwe.
UMnangagwa uphinde wasola uMnu Chamisa esithi usetshenziswa ngabelungu.
Ekhuluma leStudio 7, isikhulumeli seZanu PF uMnu Tafadzwa Mugwadzi uthe uMnangagwa uthembise uzulu weBinga intuthuko egoqela ukulungisa imigwaqo njwalo uthi uphe abasakhulayo bakuleyondawo izikepe zokusebenzisa ukugola inhlanzi.
Abamabandla amancane kanye labancintisa bezimele labo bathi bakhangelele ukunqoba nanku lobunyonyo bayiwisa phansi indlovu. Sixoxe loncintisa edinga ukuba ngumeli weEmganwini ephalamende ezimele uMnu Janana Ngwenya.
