WASHINGTON DC - Uzulu weZimbabwe uhlaba umkhosi ngokukhuphuka kwentengo yempahla ezitolo ikakhulu ukudla kanye lendleko yokugada amabhasi lemitshova.
Lokhu kuza ngemva kokukhwezwa kwentengo yamafutha ezimota yiZimbabwe Energy Regulatory Authority (ZERA) kabili kulinyanga ilandela okwenzakalayo emhlabeni jikelele. Imbangela emqoka yikuhlaselwa kweleUkraine ngeleRussia.
Ugatsha lweZimstats lona luthi imali esidingakala ukuphilisa imuli elabantu abayisithupha iqanse yaya phezu kwenkulungwane ezingamatshumi amahlanu zamadollar eZimbabwe, Z$54,864.
“Besiphiwe i-20 percent increase kodwa ungakhangela indlela izinto ezikhwele ngayo, ukhangele impuphu uyabona ukuthi imali esiyitholileyo ayisathengi lutho," kutsho uNkosikazi Belinda Maphosa, ongumongikazi.
Uqhubeke esithi, "Kunje siholile namuhla kodwa imali yakhona lokhe ithenga ebesivele sikwenelisa; okunye asisakukwanisi ngokudula. Uhulumende kumele akhiphe iRTGS asiphe iUS$, ngibona kungaba ngcono.”
Umqondisi wenhlanganiso elwela amalungelo abathengi, iNational Consumer Rights Association (NACORA), uMnu Effort Ncube uthe impi yakweleUkraine ingaqhubeka, lentengo yamafutha ezimota izakwala ikhwela njalo nje emhlabeni jikelele.
“Ngenxa yokukhwela kwamafutha ezimota kutsho khona ukuthi izinto zonke zizakhwela ngoba zihanjiswa ngamafutha ezimota... Singacina sibona amafutha ezimota esedlula iUS$3 kusiya phezulu i-litre.," kutsho uMnu Ncube. "Ngaleyo ndlela kutsho ukuthi izinto zizadula ngendlela emangalisayo. Kuyadingeka ukuthi uhulumende adinge indlela zokuvikela abantu.”
Igcwethi kwezenotho zithi ukuqansa kwentengo yamafutha kuthinte izigaba zonke zomnotho welizwe. Osomabhizimusi bona bathi akuvikeki ukuthi bakhweze intengo yezinto ngoba indleko yamafutha iyabalimaza ezikhwameni.
“lmpilo zabantu ziyaqhubeka zisiba nzima ngoba lathi intengo eqansileyo yamafutha ezimota leyi siyinike abantu abathenga kithi. Akula ndlela esingasila ngayo thina abamabhizimisi ngoba indleko lezi ziyasitshaya emini lebusuku,” kutsho usomabhizimusi wakoBulawayo uMnu Mqondisi Maphosa.
Amazwi kaMaphosa agcizelelwe ngophila ngokuthengisa uNkosikazi Mayibongwe Msipha yena othe, "Sikhathi sonke amafutha ezimota engakhwela yonke into iyakhwela. Njengabantu esizisebenzayo kubuhlungu ngoba imali esiyitholayo iya ekudleni kuphela. Impilo isinzima kakhulu.”
