WASHINGTON DC - Umkhokheli webandla leCitizens Coalition for Change (CCC) uMnu Nelson Chamisa uthi uzalibusa kuphela ilizwe leZimbabwe uMongameli Emmerson Mnangagwa efuna engafuni.
UChamisa wethule amazwi la emhlanganweni wakhe wokukhankasela ukhetho lwamaby-elections ongenwe zinkulungwane zabantu eHighfields, eHarare izolo.
Ekhuluma ngeviki edluleyo emhlanganweni ofanayo awenzele eEpworth, uMnangagwa uthe uChamisa kasoze afa angena embusweni.
Kodwa uChamisa utshele abasekeli bakhe ukuthi uMnangagwa uyazikhohlisa ngokucabanga ukuthi isikhundla sikaMongameli sabunjelwa yena kuphela.
Uthe kasoze avume ukudlelezelwa kukhetho lomnyaka ozayo njengalokhu athi kwenzakala ngo2018. Wengeze wathe nxa sokudingeka ukuthi kutshengiselwe ezitaladeni alubana lokhu kuthe kwenzeka, uzalukhokhela yena lolohlelo.
UChamisa usole njalo uMnangagwa ngokwehluleka ukubhadala ababalisi lezinye izisebenzi zikahulumende imali ethe xaxa, esithi uzulu kumele avotele ibandla lakhe ngoba kuyilo lodwa elilekhono lokulungisisa umnotho lokuthuthukisa uzulu.
Ngaphandle kokutshela abasekeli bakhe ukuthi abamabandla aphikisayo kumele akhohlwe ngokubusa eleZimbabwe, uMnangagwa wasola njalo ibandla leCCC esithi ngelezikhohlakali. Wakhuthaza njalo abantu ukuthi bakhankase ngokuthula.
Kulandela umhlangano kaChamisa lokaMnangagwa, udaba olusemlonyeni yabanengi ngolokuthi ngubani obe labantu abanengi ukwedlula omunye. Abezanu PF bathi nguMnangagwa kodwa abeCCC bathi nguChamisa.
Ingcwethi zona zithini? Nansi enye yazo ehlaziya ezombusazwe uMnu Dinizulu Macaphulana.
