WASHINGTON DC - Ibandla likaMnu Nelson Chamisa eleCitizens Coalition for Change (CCC) seliphiwe imvumo yokwenza umhlangano wokukhankasela ukhetho eHarare ngeSonto, kodwa abagcini bomthetho balifakele imigoqo elukhuni.
Amapholisa athi abasekeli balelibandla akumelanga bahambe belandelana ngezimota ezinengi betshaya ama-slogan, kanti njalo abavunyelwa ukutshaya itoyi-toyi.
Lelibandla alisoze livunyelwe njalo ukuthwala abantu ngamabhasi besuka kwezinye izigaba, ama-constituencies, besiya kulumhlangano, wona ozaqhutshelwa eZimbabwe Grounds, eHighfields.
Amapholisa athi zingephulwa izimiso lezi, azawuvala lumhlangano kungabi ndaba zalutho.
Imigoqo le isolwe kakhulu ngabasekeli bakaChamisa besithi iveza sobala ukuthi amapholisa aphatha ibandla lakhe ngesandla esilukhuni nxa kuqathaniswa leZanu PF.
UMongameli Emmerson Mnangagwa ube lowakhe umhlangano eHarare ngempelasonto edluleyo lapho okwakulamabhasi ayethwele abantu evela labo kwezinye indawo, okuyinto ibandla leCCC okuthiwa akumelanga likwenze.
Kusenjalo, ibandla leZanu PF lizakwenza imihlangano yokukhankasela ukhetho lwamaby-elections koBulawayo laseMasvingo ngoLwesihlanu.
Umhlangano wakoBulawayo uzakhokhelwa nguMnu Kembo Modadi kuthi oweMasvingo ukhokhelwe nguNkosikazi Oppah Muchinguri-Kashiri.
UMnu Constantino Chiwenga ulakho ukubakhona eMasvingo; ngeSonto olowakhe umhlangano eMarondera, umqondisi wogatsha lokwethulwa kwembiko kuZanu PF uMnu Tafadzwa Mugwadi utshele iStudio 7.
UMnangagwa kasoze abekhona emihlanganweni yangoLwesihlanu ngoba eseBrussels kweleBelgium.
