Umongameli webandla leCitizens Coalition for Change uthi kasoze avume ukuba ibandla lakhe liqilwe kukhetho lwama by-elections, oluzakwenziwa ngenyanga ezayo.
UMnu. Nelson Chamisa wethule lokhu namuhla eZimbabwe Grounds elokitshini leHighfield eHarare ngesikhathi ibandla leCCC lisungula umkhankaso wokhetho lwama by-elections. UChamisa ubonge kakhulu abantu abaphumelele ukuya emhlanganweni lo loba bebevinjwa ngamapholisa.
Abanye babo bacine behamba umango omude besuka eChitungwiza lezinye indawo, ukwenzela ukuyakuzwa uChamisa esethulela uzulu umbiko oqakathekileyo wama by-elections.
UChamisa uthe kwamnika amadlabuzane ukuba asebenzele uzulu kulandela ukuhluthunwa kwebandla leMDC Alliance nguMnu. Douglas Mwonzora labanye bakhe.
UChamisa usole kakhulu amazwi kaMongameli Emmerson Mnangagwa othi kasoze abuse ilizwe leZimbabwe. Omunye okhulume emhlanganweni lo nguBenon Ncube, okhuthaze abatsha ukuba bebhalisele ukuvota njalo bavote.
UNkosikazi Ellen Shiriyedenga, umsekeli wababona ngemisebenzi yabatsha kubandla leCCC, uthi ibandla leli lizanqoba kukhetho oluzayo.
Ibandla leZanu PF lalo belisungula imikhankaso namuhla ezabelweni ezimbili. Umsekeli kamongameli, uMnu. Constantino Chiwenga, ubesesabelweni seMarondera. Utshele abalandeli bebandla leli ukuba bevote ngobunengi babo kukhetho oluzayo. UMnu. Believe Gaule, ilunga lebandla leZanu PF. uthi iqhubekela phambili imikhankaso yabo.
Ukhetho lwama by-elections luqhutshwa ngenxa yokuthi ibandla lika Mnu. Douglas Mwonzora eleMDC-T laxotshisa kumakhansili lakudale lephalamende labo ababesekela iMDC Alliance, eyayikhokhelwa nguChamisa engakasunguli eleCCC.