WASHINGTON DC - UMongameli Emmerson Mnangagwa ubeseBrussels kweleBelgium ngoLwesithathu lapho azangena khona umhlangano wamazwe aseAfrica laweEurope oweAU-EU summit oqala kusasa uphele ngoLwesihlanu.
Injongo yalumhlangano ngeyokuqinisa ubudlelwano phakathi kwamazwekazi womabili njalo uzaqhutshwa phansi kwendikimba ethi Africa and Europe: ‘Two Continents with a Joint Vision for 2030.’
Umhlangano lo uza ngesikhathi eleZimbabwe lizama ukuvuselela ubudlelwano balo leEU. UMnangagwa useke wazama ukuhuga abatshali bezimali ezwekazi leEurope kodwa wangaphumeleli.
Ukhangelelwe ukuqhubeka ngemizamo yakhe le kanye lokugqugquzela ubudlelano obuhle phakathi kweEU leZimbabwe kulumhlangano.
Isikhulumeli sikaMnangagwa uMnu George Charamba - eloba enkundleni yeTwitter - uthe ubudlelwano beZimbabwe leEuropean Union buya buncibilika ngemva kokuphuma kweleBhilithani kulumanyano, lona athi yilo elalivimba lobubudlelwano.
Kodwa uthe kulamanye amazwe eEU alokhe engafuni ukuthi lumanyano wesule zonke izijeziso 'owazethesa iZimbabwe' uyethesa icala lokwephula amalungelo oluntu eminyakeni engamatshumi amabili edluleyo.
Lumanyano sowesule inengi lezijeziso lezi, awazethesa amalunga eZanu PF lamankampani alobudlelwano lalelibandla kwasala ezinlutshwana. EleMelika lalo lilezijeziso ezifanayo eziqhubekayo.
Amanye amazwe akuEU, iMelika kanye labalwela amalungelo oluntu bathi kumele uMnangagwa alungise indaba zamalungelo oluntu kuqala ukuze kube lokudlelana kuhle.
Ohlaziya ezombusazwe uMnu Difa Dube utshele iStudio 7 ukuthi ngempala kusakunengi okumele kulungiswe nguhulumende kaMnangagwa andubana amazwe angentshonalanga avume ukudlelana laye kuhle.
