Abacatshangelwa ukuba ngabalandeli bebandla leZanu PF ngoLwesithathu bahlasele abakubandla leCitizens Coalition for Change eHarare ngesikhathi kulungiselelwa ukhetho lwama by-elections.
Kulabanye njalo abalandeli bebandla leZanu PF abathi bahlaselwe ngabalandeli bebandla elikhokhelwa nguMnu. Nelson Chamisa eNjube koBulawayo. Amabandla womabili akhuthaza abantu ukuba bekhankase ngokuthula.
UMongameli Emmerson Mnangagwa ngoMgqibelo ukhuthaze abantu bonke ukuba bekhankase ngokuthula hatshi ukugangadana ngezagila, insimbi lokunye.
Kusenjalo, amabandla ezombusazwe athembisa uzulu ukuqhuba inhlelo ezitshiyeneyo amalunga awo enganqoba kukhetho oluzakwenziwa ngenyanga ezayo.
UMnu. Elifasi Mashaba, okubandla leZanu PF, uthi kunengi osokwenziwe libandla elibusayo kulandela ukukhethwa kuka Mnangagwa ukuba ngumongameli.
UMashaba uthi ibandla leMDC Alliance elalokhokhelwa nguChamisa labhidliza amadolobho amanengi ngakho-ke kumele uzulu avotele ibandla lakhe.
Kodwa uDokotela Nkululeko Sibanda, isikhulumeli sikamongameli weCCC, uthi abantu kabakhohlwanga okwenziwa nguMnangagwa, owayesebenza lomuyi uRobert Mugabe ngesikhathi sombhuqazwe weGukurahundi.
USibanda uthi ibandla lakhe lilakho ukulethela uzulu inguquko abantu bengalivotela kukhetho oluzayo.
