Inhlanganiso ebona ngezokhetho eyeZimbabwe Election Support Network (ZESN) ithi ikhathazekile ngokukhulunywa ngamanye amalunga ebandla leZanu PF kanye labanye abakubandla leCitizens Coalition for Change abafuna kuguqulwe isisekelo sombuso welizwe ukwenzele ukuba kungaqhutshwa ukhetho ngomnyaka ka2028.
Lokhu kuza ngesikhathi abanye abakubandla leCCC besekela ukuthi lungaqhutshwa ukhetho lolu njalo uMongameli Emmerson Mnanagwa aqhubeke esembusweni.
IZESN ithi kuyamangalisa ukuba kulabantu abafuna ukuba ukhetho okumele luqhutshwe ngo2028 lubekhona ngo2030 njengalokhu okufiswa ngabanye abakubandla elibusayo labakucele leCCC elikhokhelwa nguMnu. Sengezo Tshabangu, ozithi ungunobhala jikelele webandla leli.
UTshabangu owethekelele ipulazi likaMnangagwa ngempelaviki lamanye amalunga ebandla leCCC lawelibusayo, uthe kuyabe kuqondile ukuthi uMnangagwa aqhubeke esesikhundleni kuze kufike umnyaka ka2030 uma uzulu ekusekela lokhu. Kulabasola kakhulu amazwi kaTshabangu.
Omunye wabo nguMnu. Phumulani Sibanda, isikhulumeli seCCC koBulawayo.
UMnu. Gift Ostallos Siziba owakewabeyisikhulumeli sebandla leCCC laye uthi uTshabangu ukhuluma ihlazo.
Kasenelisanga ukukhuluma loTshabangu legcwetha lakhe ngodaba lolu ngoba bebengaphenduli omakhalekhukhwini. Sixoxe loMnu. Kucaca Phulu obesepulazini lika Mnangagwa ngempelaviki.
Abakubandla leZanu PF bathi uTshabangu yindoda emadodeni. Omunye wabalombono lo nguMnu. Joseph Tshuma omele iPelandaba Mpopoma edale lephalamende.
Kulabanye abakubandla leZanu PF abaphikisa ukuba uMnangagwa aqhubeke ebusa kungafika umnyaka ka2028, okugqitshwa khona umbuso wakhe.
Kuzamele kwenziwe iReferendum kungakaguqulwa isisekelo sombuso welizwe. Okwamanje sikubeka sobala ukuba umongameli osesikhundleni kavunyelwa ukuhlala embusweni isikhathi sakhe singaphela esokubusa.
SEE ALSO:
Udaba Esilwethulelwe NguGibbs Dube