UMongameli Emmerson Mnangagwa, yena okukhefu, useqhelise ngomnyaka isikhathi sokusebenza komkhokheli webutho uGeneral Phillip Valerio Sibanda lanxa esefikise iminyaka yokuya kumpentsheni.
Ngeviki ephelileyo uMnagagwa ususe ezikhundleni umkhokheli wogatsha lwabacuphi, olweCIO, uMnu Isaac Moyo kanye losikomitshi wamapholisa uMnu Godwin Matanga wafaka abakhokheli abatsha.
Uhulumende usanda kuqhelisa iminyaka yokusebenza kwezisebenzi zakhe ezigoqela amasotsha.
Umthetho omutsha uthi isotsha kumele litshiye umsebenzi lingafikisa iminyaka yokuzalwa engamatshumi amahlanu lanhlanu, 55, kusiya kwengamatshumi ayisithupha lanhlanu, 65. Iminyaka le ukhwele isuka kwengamatshumi amahlanu, 50.
Abaholi bamasotsha bona sebevunyelwa ukutshiya umsebenzi bengafikisa iminyaka engamatshumi ayisikhombisa lanhlanu, 65, kusiya kwengamatshumi ayisikhombisa, 70, okuyiminyaka esifikiswe nguValerio Sibanda.
Abacubungula ezombusazwe bathi uMnangagwa wenze lokhu ngezizatho zombusazwe.
Umkhokheli wenhlanganiso elwela amalungelo oluntu eyeMatabeleland Institute for Human Rights uMnu Khumbulani Maphosa utshele iStudio 7 ukuthi asikho isizatho sokuqhelisa ikontilaka kaMnu Sibanda ngoba usefikise isikhathi sakhe sokuyaphumula.
Forum