Sezisifa inkomo esabelweni seMatabeleland South ikakhulu eBulilima, Insiza leGwanda ngenxa yokuswelakala kwamadlelo lamanzi.
Kulesomiso esikhulu lonyaka eZimbabwe esibangelwe yisikhudumezi somkhathi ese-El Nino, esenza izulu lingani phose elizweni lonke lakwamanye amazwe. UNkosikazi Saziso Khumalo oyisakhamuzi seVokola eInsiza uthi ukutsha kwamadamu amanengi kulesisiqinti sekudale ukuthi inkomo zife ngoba sezibanjelwa emadamu agcwele udaka.
"Inkomo aziselakudla, aziselamanzi zitshona zibhoda kwezinye indawo amadamu asetshile zingena phakathi ziyabanjelwa zitshona zidonswa ezinye sezifela phakathi, umumo wakhona ubuhlungu kakhulu asikwazi ukuthi singenza cebo bani okokuthi ngabe siyathola amanzi loba kulokudla okulutshwane kubengcono manje konke akusekho hayi umumo awumuhle.
UMnu. Collen Ngwenya isakhamuzi seMatobo laye uthi isimo sibi kakhulu lonyaka.
"Indawo yakithi ilesomiso esibuhlungu ngoba lonyaka kubi ngendlela yokuthi alizange lenele izulu kumbe live khona ukuthi likhulise utshani kumbe ligcwalise amadamu, ngalesisikhathi kweminye iminyaka amadamu ayabegcwele inkomo zingahambeli amanzi, ngalesisikhathi sebusika amahlamvu ezihlahla sethintitheka seziwakhuma phansi. "
UMnu. Miclas Ndlovu ongukhansila kaWard 13 eGaranyemba uthi sokufe inkomo ezimbalwa esigabesi sakhe njalo ezinye sezicuba.
"Isimo senkomo sibili, esezifile zibulawa yikuswelakala kokudla
lapha abadala bangitshela ukuthi ziyafika ezinhlanu kodwa ezinye sezivuswavuswa akuhle kubuye ukudla kulokuthi kubuye abantu sebefelwe inkomo lalezo zikhona ziyabe zingasavuseki."
Ingcwethi yezifuyo kugatsha lwezokulima olweAgritex, eMatabeleland South, uMnu. Zondani Muchemwa, uthi imibiko asebeyitholile iveza ukuthi sekufe inkomo ezingamatshumi amabili lantathu 23 eBulilima ukuthi eGwanda ezilitshumi lanye esezibulewe yindlala.
Kusukela nyakenye inkomo ezifika inkulungwane ezilitshumi 10,000 sezafa esabelweni lesi ngenxa yendlala okulinani elikhangelelwe ukuthi lizaqonga okumangalisayo lonyaka.
Kusenjalo, umeli wedale lephalamende eGwanda South, uMnu. Omphile Marupi, ukhala ngokutshotshwa kwezifuyo kulumhlubulo.
Ekhuluma esikolo seManama kuviki edlulileyo lapho umsekeli kamongameli uMnu. Kembo Mohadi abesethekelela khona ukuyakwethula isipho sama laptop, uMarupi uthe ikusasa yabafundi laba iluvilibana ngenxa yamasela atshontsha inkomo eziyizo ezithengiswa ngabazali babo ukuze beyesikolo.
"Abantwana laba abalapha kungenzeka ukuthi kuthemu elizayo bengaphenduki ngoba inkomo zaboyise eziyizo ezithengiswa yo zibhadala ifees sezitshontshiwe ngoba ibhanga labantu bakulumango zinkomo."
Ukutshontshwa kwezifuyo ezibalisa obabhemi kanye lembuzi kubhahile esabelweni lesi kungenani lezijeziso ezethulwa yimthethwendaba kulabo ababanjwayo.