Inhlanganiso ezilwela amalungelo oluntu sezisole kakhulu isinqumo sezinduna eziphiwe umlandu wokulungisisa udaba lweGukuraundi esokuthi azisoze zivumele intathelizindaba emihlanganweni ezizayiqhuba labantu ababulawelwa izihlobo kumbe abahlukunyezwa ngamabutho eFifth Brigade ngesikhathi salumbhuqazwe.
Izinduna lezi ziphiwe lumlandu nguMongameli Emmerson Mnangagwa.
Umkhokheli wogatsha lwezinduna olweChiefs Council uMnu Mtshana Khumalo uveze kunsukwana ezedluleyo ukuthi intathelizindaba zizatshelwa kuphela okuyabe kukhulunywe ngabantu emihlanganweni le nxa isiphelile.
Kodwa abalwela amalungelo oluntu bathi uhulumende uzama ukufihla iqiniso elizakhulunywa kulimihlangano nxa intathelizindaba zingekho.
UKhumalo uthe njalo abantu abahlala emadolobheni abathintwa yiGukurahundi abafuna ukupha ubufakazi kuzamele baye amaphandleni ngoba kulapho okuzaqhutshelwa khona limihlangano kuphela, hatshi emadolobheni.
Olunye udaba olusolwa ngabalwela amalungelo oluntu ngolokuthi izinduna lezi azilalo uhlelo lokuyakhulumisana labantu beMidlands, okungesinye sezigaba ezahlaselwa ngamabutho kamuyi uRobert Mugabe ngeminyaka yabo 1980 labulala abantu abedlula inkulungwane ezingamatshumi amabili, 20,000, khona eMidlands, eMatabeleland North laseMatabeleland South.
UKhumalo utshele iStudio 7 ukuthi lanxa bekhona abalensolo, bazasebenza ngemvela abahlele ngayo njengezinduna ngoba kuyiyo abacabanga ukuthi ingasebenza kuhle.
Your browser doesn’t support HTML5
Ingxoxo loChief Mtshane Khumalo
Kodwa isiphathamandla senhlanganiso ekhankasela ukuthi udaba lweGukurahundi lulungiswe ngendlela esuthisayo eyeIbhetshu Likazulu uMnu Mbuso Fuzwayo uthi ngendlela izinduna ezifuna ukuphatha ngayo loluhlelo, kusobala ukuthi iqiniso alisoze liphume.
Your browser doesn’t support HTML5
Ingxoxo loMnu Mbuso Fuzwayo