Ihofisi ebona ngenhlelo zokuphathisa abalambayo kumanyano weUnited Nations eyeOffice for the Coordination of Humanitarian Affairs (OCHA), ithi inkomo sezicake kakhulu eMatabeleland North leSouth njalo ezinengi zazo zilakho ukubulawa yindlala lonyaka.
Kumbiko ewethule liviki, i-OCHA ithe kwezinye indawo izifuyo seziqalile ukufa futhi ithi umumo uya usiba mubi ezigabeni zeMasvingo leMidlands.
Ihofisi le ixwayise ukuthi izifuyo eZimbabwe lasemazweni atshiyeneyo asezansi yezwekazi leAfrica zizahlaselwa yimikhuhlane efana le-anthrax ezaphehlwa yikuhambahamba kwazo kanye lenyamazana zendle zidinga amadlelo lamanzi.
Ngokunjalo ihofisi le ithi kumele kube lenhlelo zokwenqabela imikhuhlane le, ezokuphandela izifuyo amanzi okunatha kanye lezokuphathisa abafuyi ngokudla.
I-OCHA ithi njalo abantu abahlaselwe yindlala emazweni asezansi yeAfrica agoqela yona iZimbabwe, Zambia, Malawi DRC lamanye, bayizigidi phose ezingamathumi amabili, 18 million.
Umfuyi wenkomo eMatabeleland South uMnu Zenzele Ndebele utshele iStudio 7 ukuthi umkhathi uzaphoqa abantu ukuthi bathengise izifuyo zabo ngemali encane kakhulu ngoba lokho kungcono kulokuthi zibulawe yindlala bengatholi lutho.
Your browser doesn’t support HTML5
Ingxoxo loMnu Zenzele Ndebele