Ihofisi ebona ngenhlelo zokuphathisa abalambayo kumanyano weUnited Nations, eyeOffice for the Coordination of Humanitarian Affairs (OCHA), ithi indlala yalonyaka izadala ukuthi abantwana abedlula izigidi ezintathu, 3.5 million, eZimbabwe lasemazweni amanengi esezansi yeAfrica babanjwe yimikhuhlane ebangelwa yikuswela ukudla okwakha umzimba, i-malnutrition.
Kumbiko ewethule ngoLwesibili, i-OCHA ithe amanye amazwe abhekane lodubo lolu abalisa eleAngola, Democratic Republic of Congo, Madagascar, Malawi, Namibia, Mozambique, Zambia, eSwatini laseLesotho.
Ithi njalo abantwana abafika phose isigidi esisodwa, 900,000, emazweni lawa bazadinga ukwelatshwa imikhuhlane ebangelwa yikuswela ukudla, i-severe malnutrition kanti abanengi babo balakho ukwekela isikolo ngenxa yendlala.
Sikhulumanje eZimbabwe, inhlanganiso yeUnited Nations Children's Fund (UNICEF) ithi kulabantwana abayingxenye yesigidi, 500,000, abangayi esikolo ngenxa yokuswela imali.
I-OCHA yazise njalo ukuthi abantu abahlaselwe yindlala emhlubulweni wangezansi yeAfrica yonke bayizigidi phose ezingamatshumi amabili, 18 million.
E-Zimbabwe kuphela uhulumende uthi abantu abalambayo abadinga usizo lokudla oluphuthumayo bayizigidi phose ezintathu, 2.7 million kodwa inhlanganiso yeFood and Agriculture Organization (FAO) ithi inani leli selikhwelile laya kuzigidi ezintathu ezilengxenye, 3.5 million.
Isiphathamandla senhlanganiso esebenza labantwana kanye labesifazana eyeGender Networks uMnu Methembe Songo utshele umsakazo weStudio 7 ukuthi ikusasa labantwana eZimbabwe lasemazweni amanengi libuvilibana ngenxa yendlala.
Forum