Kumbiko ewethule ngomnyaka ka2023, inhlanganiso yeTransparency International ithe amazwe amanengi ezwekazi leAfrika ayehluleka ukulwisana lenkohlakalo.
Amazwe la agoqela eleGhana lapho ugatsha lweCommission on Human Rights and Administrative Justice (CHRAJ) oluthi imali kahulumende engena kusilinganiso samatshumi amabili ekhulwini, 20 percent iyebiwa.
Inhlanganiso ezizimeleyo sezingena emkhankasweni wokuqeda ukungethembeki lokhu, kubika uNtungamili Nkomo weStudio 7 ehumutsha udaba esilwethulelwe nguIsaac Kaledzi ngeSingisi eseAccra.
Intathelizindaba zakweleGhana ezisebenzela iphephandaba leFourth Estate, eliphansi kwenhlanganiso yeMedia Foundation for West Africa, zihlela udaba lophenyo oluzaveza okufihlakeleyo.
Umhleli wephephandaba leThe Fourth Estate uKofi Enchill uthi, “Sisebenza labantu baseGhana; sisebenza labahlebi abasinikeza imfihlo. Sikhangela udaba sijule ngalo, sibe sesilwethula enkundleni zobulembu be-internet, siludinde, silwethule enkundleni yeYouTube kumbe senze i-documentary.”
Iphephdandaba leli lethula indaba eziphathelane lenkohlakalo. Kusukela lisungulwa ngomnyaka ka2021, selethule izindaba ezinengi eziveza sobala imisebenzi yokungethembeki.
Olunye lwezindaba lezi ludaba lokuveza impahla yeziphathamandla zikahulumende kulandela ukwethulwa komlayo owawuphoqa ukuthi zivezele umphakathi impahla yazo.
I-Fourth Estate yakhweza loludaba kuCommission on Human Rights and Administrative Justice yeGhana, yona eyavula uphenyo.
UEnchill uthe,“Ekwethuleni kwethu loludaba, iziphathamandla zikahulumende ezingamakhulu phose amathathu, 294, zahle zaphuthuma zaveza impahla yazo. Kodwa singakenzi lokhu, bonke laba babengakatsho ukuthi balani. Ukuphuma kwabo egcekeni kwathumela umlayezo omuhle kuziphathamandla zikahulumende.”
Abakhankasela ukulwisana lokungethembeki eGhana bathi inkohlakalo isibhahile lanxa ilizwe lethule umkankaso weNational Anti-corruption Action Plan, okuluhlelo lokulwisana lenkohlakalo.
UNkosikazi Awelena Addah ngumqondisi wenhlanganiso yeGhana Integrity Initiative.
Uthi, “Uhlelo lweNational Anti-Corruption Action Plan lwalusipha sonke umlandu wokulwisana lenkohlakalo, kodwa uzananzelela ukuthi kulamaphutha amanengi amele angakhangelwayo, ngokunjalo lokhu kwenza umkhankaso lo ube nzima.”
Amanye alawo maphutha agoqela imithetho engelahlonzi evimba umsebenzi wengatsha zikahulumende ezilomlandu wokuphenya lokubopha iziphathamandla zikahulumende ezingethembekanga.
Inhlanganiso ezizimeleyo ezifana leyeCentre for Democratic Development (CDD) zigcalisa leso sikhala ngokwenza lumsebenzi. Ngo2017, inhlanganiso le yasungula uhlelo lweCorruption Watch Project ngenjongo yokwehlisa inkohlakalo kungatsha zikahulumende ngokubamba iqhaza lomphakathi.
UKojo Pumpuni Asante, ongumqondisi weAdvocacy and Policy Engagement kuCDD uthi, “Siyenelisa ukwenza uphenyo olujulileyo, silentathelizindaba ezifundele ukwenza lokhu. Siyazama futhi ukuphenya indaba esicabanga ukuthi zibanjiwe nje zekelwa kungaphenywanga ngokujulileyo, sibuye sivuselele futhi lezindaba eziyabe sezafakwa eceleni abantu bakhohlwa ngazo.”
Umkhankaso weCenter for Democratic Development eminyakeni engamatshumi edluleyo ukhanya uphumelela.
UAsante uthi, “Inhloso yethu njengoba sesitshilo, besingafuni ukuthi abantu bakhohlwe-nje ngodaba lwenkohlakalo. Besifuna ukuthi luhlale lusemiqondweni yabantu; babekwazi ukuthi kumele siqhubeke sisilwa lokungethembeki ngoba siyakunanzelela ukuthi abantu sebebona nje angani inkohlakalo yinto ejwayelekileyo.”
Kungenxa yenhlanganiso ezizimeleyo ezifana lale ukuthi umzabalazo wokulwisana lenkohlakalo uhlala usemqondweni kazulu ngaso sonke isikhathi.
Umqondisi wenhlanganiso yeGhana Integrity Initiative uMary Awelena Addah uthi, “Ababona ngokulwisana lenkohlakalo labakhuthaza ukuthembeka sebenze umsebenzi omkhulu, sesenze uphenyo oluveza ukuthi inkohlakalo ibhahile futhi kudingeka ukuzimisela ukuthi siyiqede.”
ITransparency International ithi eminyakeni emine edluleyo umkhankaso wokulwisana lenkohlakalo eGhana awuyindawo udlalela ndawonye futhi nyakenye ilizwe leli akula mklomelo lowodwa eliwutholileyo oveza ukuthi lilwa lokungethembeki. Lokhu ngokwesine iminyaka ilandelelana.
Phakathi kwamazwe angamakhulu phose amabili, 180, eleGhana likuzinga lamakhulu ayisikhombisa, 70, kundaba zenkohlakalo. Ingcwethi zithi ukbotshwa kweziphathamandla eziphatheka kumisebeni yenkohlakalo kungaba yinto emqoka ekuqedeni ukungethembeki.
Your browser doesn’t support HTML5
Udaba Silwethulelwa nguNtungamili Nkomo