Amabandla ezombusazwe aphikisayo lozulu jikelele bathi eleMelika lenze kahle ukuphuma kuhlelo lweZimbabwe lokuzama ukulungisa izikwelede zamabhanga ngoba uhulumende kaMongameli Emmerson Mnangagwa wephula ilungelo loluntu njalo akuqhutshwanga ngemfanelo ukhetho nyakenye.
Kodwa abakubandla elibusayo bathi eleMelika lihlezi liqophe eleZimbabwe kwezombusazwe.
Ekhuluma leStudio 7 uNkosikazi Ellaine French uthe eleMelika kalisoze liphatheke kuhlelo lweZimbabwe Structured Dialogue Platform on Debt Clearance, lona oluhlose ukusiza eleZimbabwe ukuba libhadala imali eyibolekwa ngamabhanga aphandle kwelizwe, uthe uhulumende wephula ilungelo loluntu njalo wehluleka ukuqhuba ukhetho olukhulilekileyo ngoNcwabakazi ngomnyaka ophelileyo.
UNkosikazi French uthi loba kunjalo, bazaqhubekela phambili besekela abantu eZimbabwe.
“Ele Melika lizimisele ukuqhubeka lisebenza lele Zimbabwe lobanje kukungeni okumele kulungiswe ukuphenduka kumbuso kazulu.’’
UNkosikazi French uthe ukuze ele Zimbabwe lenelise ukukhulumisana lamazwe aphandle ngendaba zesikwelede selizwe esifika phose amabhiliyoni angamatshumi amabili – 17.7 billion, kumele eleZimbabwe lihloniphe ilungelo likazulu. Uthe ngenxa yokuswelakala kombuso wentando kazulu eZimbabwe, ubudlelwano phakathi kwamazwe la bumi manzonzo.
Lokhu kugcizelelwe nguzulu weZimbabwe, ingcitshi lamabandla aphikisayo abathi ibandla leZANU PF kalisoze lenelise ukukhulumisana lamanye amazwe ngenxa yombuso walo ophambana lentando kazulu.
Omunye ogcizelela kulokhu yisikhulumeli seCitizens Coalition for Change, uMnu Promise Mkhwananzi, othi lokhu akumangalisi ngoba iZANU kayilandeli okwavunyelwanayo ngesikhathi kusenziwa imihlangano yokubhadala izikwelede zelizwe leli.
“Thina savela sakutsho ukuba ibandla le ZANU PF laqila kukhetho. Laqila njalo ngeiskhathi kukhulunyiswana ngendaba zezikwelede. Akula okuzaphuma nxa iZANU PF ikhulumisana lamazwe aphandle. Kuzakuba nzima ukuba ele Zimbabwe lithenjwe ngamanye amazwe.’’
Lokhu kusekelwe yingcitshi kwezombusazwe uMnu. Hebert Chamuka okubandla lePeople’s Unity Party yena othi ibandla leZANU PF lilodwa alisoze lenelise ukukhulumisana leleMelika.
“Kuzaba nzima ukuba kube lokukhulumisana phakathi kwe Melika lele Zimbabwe ngoba ngesikhathi esikiso vele ZANU PF kayethenjwa ngamanye amazwe. Uhulumende lo kumele abambane labanye kuleli ukuze lokhu kulungisiswe sizwanane lamanye amazwe.’’
Esinye isakhamuzi seHarare, uMnu. Gilbert Dube, uthi akumangalisi ukuba amanye amazwe alakho ukulandela lokhu osokwethulwe ngele Melika.
“Manengi amazwe alakho ukuthatha inyathelo elifana laleli. Kuzakwenza ukuba impilo yethu njengo zulu ibe nzma ngoba sithemba lawa mazwe njengelizwe ukuze sithole imali.’’
Omela uhulumende engumholi wogatsha lwezokukhitshwa kwemibiko phandle kwelizwe, uMnu. Richard Mahomva, uthi uhulumende kalani lalokho okutshiwo ngele Melika.
“Thina lokhu esikwenzakayo asikutshelwa ngamazwe aphandle. Sizimisele ukuqeda indubo zethu sodwa.’’
Ezinye ingcwethi ezibona ngokudlelana kwamazwe womhlaba zithi okuhlala kukhulunywa nguMnangagwa ukuthi eleZimbabwe lilobudlelwano obuhle lamazwe womhlaba yikusoma nje ngoba abanengi besithi uyaphanga athembise okunengi lokuloba izivumelwano kodwa engasoze afeze lezo zithembiso lokulandela izinqumo zezivumelwano lezo.
Ingcwethi ezicubungula ezomnotho lazo zixwayisa ukuthi nxa eleMelika lingavala uncedo lwayo lwemali umnotho weleZimbabwe uyahle ubhidlike.