EleMelika seliphumile kuhlelo lokuhlawulwa kwezikwelede zakwele Zimbabwe lamabhanga atshiyeneyo olwe Zimbabwe Structured Dialogue Platform on Debt Clearance lisithi eleZimbabwe lephula ilungelo likazulu njalo kaliqhubanga kahle ukhetho ngomnyaka ophelileyo.
Lokhu kwethulwe nguNkosikazi Ellaine French izolo kungxoxo ayenze leStudio 7 lapho akhulume kabanzi ngokukhathaza eleMelika, okugoqela njalo ubukhohlakali lokunye.
Kodwa uhulumende kaMongameli Emmerson Mnangagwa uthi eleMelika kalithakazeleli inguquko eyenziwa nguhulumende.
Ukuze sizwe okunengi ngodaba lolu, sixoxe loMnu. Fortune Mlalazi okubandla leCitizens Coalition for Change othi `eleMelika liyitshaye ekhaleni ngoba kunengi okubi okwenziwa libandla elibusayo.
Kodwa uMnu Kuda Munsaka owebandla leZanu PF uthi eleMelika lizonda kakhulu eleZimbabwe elahluthulela abamhlophe umhlabathi kusukela ngomnyaka ka2000.
Ukhala njalo langezijeziso zenotho ezetheswa amalunga ebandla leZanu PF ngamazwe entshonalanga akhala kwelungelo likazulu eZimbabwe.
UMlalazi uyakuphika lokhu esithi eleZimbabwe libiselwa muva ngamalunga eZanu PF anganaki luthi ngempilo yabantu.
EleZimbabwe lilezikwelede emabhanga aphandle kwelizwe afika phose amabhiliyoni alitshumi lantathu - US$12.7 billion lezikwelede zamabhanga aselizweni afika amabhiliyoni amahlanu - US$5 billion.
Forum