Abalwela amalungelo oluntu labamabandla aphikisayo bathi baphatheke kabi ngokuthi akulamuntu osebotshiwe phezu kokubulawa kwelunga leCCC uMnu Tapfumaneyi Masaya lanxa nje sokwedlule inyanga ezintathu.
UMasaya wathunjwa ngabantu ababehlome ngemibhobho abacatshangelwa ukuthi ngabacuphi, amaCIO, kumbe amalunga ebandla elibusayo leZanu PF nyakenye ngoLwezi ngesikhathi sokhetho lwama-by-elections watholakala efile eHarare.
Ethunjwa wayephakathi kokudingela usekelo ilunga leCCC elalincintisana lelunga leZanu PF uMnu Scott Sakupwanya kukhetho lokudinga ummeli weMabvuku-Tafara edale lePhalamende.
Umfelokazi kaMasaya utshele iStudio 7 kunsukwana ezedluleyo ukuthi ukhathazekile ngokuthi ababulali bomyeni wakhe lokhe bengakabotshwa.
Lumsakazo usulesikhathi uzama ukuxhumana lesikhulumeli samapholisa uAssistant Commissioner Paul Nyathi ngaloludaba kodwa esithi akekho ehofisini.
Ilunga leCCC uMnu Swithern Chiroodza uthi ukungabotshwa kwabantu ababulala uMasaya akumangalisi ngoba kukhanya kulesandla sikahulumende phakathi.
Your browser doesn’t support HTML5
Ingxoxo loMnu Swithern Chiroodza
Uhulumende kanye labebandla leZanu PF bayakulandula ukuthi yibo ababulala uMasaya.