Kulengcwethi ezicubungula ezombusazwe lamagqwetha azimeleyo athi kumele ibandla leCitizens Coalition for Change liphanyeke udaba lwempumela yokhetho emthethwandaba ngesiphangiphangi ukuze kwazakale ingqubekela phambili.
Kodwa ibandla leZanu PF lithi akulabufakazi obuveza ukuthi ukhetho lolu aluqhutshwanga ngemfanelo.
Igqwetha elizimeleyo, uMnu. Tedious Ncube, uthi ibandla eliphikisayo kumele liphanyeke udaba lolu emthethwandaba ngokutshetsha.
Lokhu kusekelwa ngelinye igqwetha, uMnu. Kudakwashe Ndebele, yena othi kumele baye emthethwandaba becele ukuba ukhetho luphindwe.
UMnu. Rejoice Ngwenya, ingcwethi ecubungula ezombusazwe ezimele, uthi kulobufakazi obunengi obuveza ukuba ukhetho lolu kaluqhutshwanga ngemfanelo.
UMnu. Ashely Pfunye, ingcwethi kwezombusazwe ezimeleyo, uthi kumele ibandla leCCC lithole ubufakazi obuqotho kunhlanganiso yeSouthern African Development Community.
Kodwa ilunga leZANU PF, uMnu. Mabutho Moyo, uthi akula bufakazi obuveza ukuthi ukhetho kaluqhutshwangwa kahle.
UMnu. Promise Mkhwananzi, isikhulumeli seC-C-C, uyakuphikisa lokhu.
Eyinye njalo ingcwethi kwezombusazwe, uMnu. Nkosana Dlamini, uthi kusobala ukuba akulalutho oluzaphuma emthethwandaba ngakho-ke abantu kabatshengisele emigwaqweni besola okwenziwe yikhomishini ebona ngokuqhutshwa kokhetho eyeZimbabwe Electoral Commission.
Umanyano weMDC Alliance, owawukhokhelwa nguMnu. Nelson Chamisa, waphanyeka impumela yokhetho emthethwandaba ngomnyaka ka2018. Idale leConstitutional Court lathi uMnangagwa nguye owanqoba kukhetho lolu.