Abesifazana abangamatshumi ayisikhombisa - 70 bancintise kukhetho oluqhutshwe kuviki edluleyo kuzihlalo ezilikhulu lamatshumi amabili - 120 kwanqoba abangamatshumi amabili lanye - 24, njalo owesifazana oyedwa obekukhetho lokudinga umongameli welizwe uNkosikazi Elizabeth Valerio kanqobanga.
Umhlaba jikelele, lezizalwane zakuleli zikhathazekile ngenani eliphansi labesifazana abenelise ukunqoba kukhetho uma kuqathaniswa lokhetho oludlule luka 2018.
lsakhamuzi sakoBulawayo, uNkosazana Bekezela Mguni, uthi ukhathazekile ngenani eliphansi elingene kukhetho.
"Imali yokungena kukhetho eyenomination fee ivalele inengi labomama ukuthi bangene bancintise ukuba ngamalunga edale lephalamende kuhlanganisa lobudlwangudlwangu ubuza ngendlela ezehlukeneyo."
UNkosazana Sichelesile Mahlangu onqobe esigabeni sePumula koBulawayo laye ukhala ngokwehla kwenani labesifazana abenelise ukuphatheka lokunqoba kukhetho lwalonyaka.
UMqondisi weGirls Table, inhlanganiso elwela amalungelo abasakhulayo, uNkosazana Samukeliso Tshuma, uthi abangene ngokuvotelwa edale bangamatshumi amabili lanye.
Inombolo ezikhulunywa nguNkosazana Tshuma, yizo njalo ezikhulunywa yiZimbabwe Gender Commission njalo bathi basaphakathi kokuhlolisisa besebenza leZimbabwe Electoral Commission ukuthi batsho ukuba abesifazana abanqobe kukhetho lwekhansili bangaki ngoba okwamanje abakabi lenani lelo.
Lonyaka abesifazana abangu 70 bangene bencintisa kuzihlalo ezingu 210 zedale lephalamende okuyisilinganiso setshumi lanye ekhulwini kuqathaniswa labesilisa abangu 637. Ngo2018, kwaba labesifaza abangu 237 okwabayisilinganiso setshumi lane ekhulwini - 14,4 percent kuthi abesilisa baba yi-1,648.
Ngomnyaka ka2018 kwabalamabandla angu55 angena kukhetho, kuthi lonyaka kube langu 19, elilodwa lakhona limelwe nguNkosikazi Elizabeth Valerio obengowesifaza oyedwa phakathi kwabesilisa abalitshumi njalo kanqobanga kulolukhetho.
Forum