Amapholisa achithe umhlangano weCCC lentathelizindaba eHarare ngoMgqibelo ezama ukubopha isikhulumeli salelibandla uMnu Promise Mkhwananzi.
UMkhwananzi ubekhuluma phambi kwentathelizindaba lezi emahofisini enhlanganiso yeSAPES lapho ahlaselwe khona ngabesilisa abahlanu abangazivezanga ukuthi bangobani.
Omunye wabo ufike wahluthunela uMkhwananzi amaphepha abelombiko ekade ewethula esola indlela okuqhutshwe ngayo ukhetho, wazama njalo ukumdonsa kodwa wehluleka.
Lokhu kudale ingxabangxoza enkulu kwangenela intathelizindaba leziphathamandla zeCCC ebezikhona zibuza ukuthi abantu laba bangobani njalo bebefunani.
Amapholisa abengagqokanga impahla zomsebenzi ezama ukubopha isikhulumeli seCCC uMnu Promise Mkhwananzi ngesikhathi ekhuluma lentathelizindaba ngoMgqibelo eHarare.
I-CCC ithi abantu laba bebezama ukuthumba uMkhananzi.
Unobhala weCCC obona ngokudlelano lamanye amazwe uNkosazana Gladys Hlatshwayo uvuke ubhova watshela amadoda la ukuthi ayangise ilizwe leZimbabwe futhi alihlazo elikhulu.
Abesilisa laba basuke bachitheka sebengena ezimoteni zabo begijinyiswa zintathelizindaba zibuza ukuthi bangobani. Kodwa bangene ezimoteni zabo bahamba bengatshongo lutho.
Amapholisa ahlasele isikhulumeli seCCC uMnu Promise Mkhwananzi ezama ukumbopha ngesikhathi ekhuluma lentathelizindaba ngoMgqibelo eHarare.
Kuthe ngemva kwesikhatshana isikhulumeli samapholisa uMnu Paul Nyathi wethula umbiko esithi abantu laba ngamapholisa ekade ezama ukubopha uMkhwananzi, yena athe ulecala alidala ngomnyaka ka2020.
Kodwa uMkhwananzi utshele iStudio 7 ukuthi akulacala alalo, futhi uthe abantu laba bebezama ukumthumba ngoba bengafuni ukuthi asole indlela okuqhutshwe ngayo ukhetho olwenziwe ngoLwesithathu.
Your browser doesn’t support HTML5
Ingxoxo loMnu Promise Mkhwananzi
Ingcwethi kwezombusazwe uMnu effie Dlela Ncube uthe ngokuzama ukuhluthuna uMkhwananzi phansi kwama-camera abomabonakude umhlaba ubukele, uhulumende weZimbabwe uzigwaze ngowakhe ikakhulu ngemva kokuba inhlanganiso ebezihlola ukhetho ezigoqela iSADC leAU zithe ukhetho lolu aluqhutshwanga ngemfanelo.
Your browser doesn’t support HTML5
Ingxoxo loMnu Effie Dlela Ncube