Amalunga enhlanganiso ezizimeleyo ebeziqaphe ukhetho, ezibalisa iElection Resource Center, iZimbabwe Election Support Network (ZESN) kanye leTeam Pachedu, abotshwe ngoLwesithathu eHarare amiswe enkantolo namuhla esetheswa icala lokuqoqa ukwethula impumela yokhetho ngaphandle komthetho.
Abasolwa laba bakhululwe ngemali yesibambiso, eye-bail, engena kumamakhulu amabili amadola aseMelika umuntu ngamunye, US$200, ngemva kokuba amapholisa labatshutshisi bethe abaphikisi ukukhululwa kwabo.
Umantshi uMnu Ngoni Nduna uthe kumele baphenduke emthethwandaba mhlaka 28 ngenyanga ezayo.
Amapholisa athi abophe abantu laba ngemva kokuncwetshwa undlebe ukuthi bebebuthene eHoliday Inn beqoqa amanani okhetho bencedisana lebandla leCCC ngenjongo yokwethula impumela yalolukhetho ingakethulwa ngokusemthethweni yiZimbabwe Electoral Commission.
Kodwa inhlanganiso ezilwela amalungelo oluntu ezigoqela yona iZESN, iElection Resource Center, iTeam Pachedu, iZimbabwe Lawyers for Human Right. Girls Table lezinye, sezisole ukubotshwa kwabantu laba zisithi abephulanga mthetho.
Lobanje ukhetho luqhutshwe ngokuthula kwezinye indawo inhlanganiso ezifana leSADC lezinye ebezithumele amaqula eZimbabwe zithi kunengi okungahanjiswanga kuhle.
Kusenjalo, amapholisa asevale imigwaqo kwezinye indawo ezifana leHarare, ikakhulu eya lapho okumenyezelwa khona impumela yokhetho, ama-command centers lasemahofisini eZimbabwe Electoral Commission kanye lesigodlo seZanu PF.
Abamabandla aphikisayo lokhe bekhala ngokwethuselwa kwabantu ngamalunga enhlanganiso esekela ibandla leZanu PF eyeFAZ. Nangu uMnu Swithern Chirowodza owebandla leCCC koBulawayo.
"Kulamatafula eFAZ abefakwa kundawana zonke zokuvotela koBulawayo bebhala amabizo alabo abavotileyo bethatha inombolo zezithupha, iminyaka yabo lokuthi bavotele bani okuyikwephula amalungelo oluntu ngesikhathi sokuvota."
Isiphathamandla senhlanganiso yeFAZ uMnu Kudakwashe Munsaka uthi akulalutho olubi abelwenzileyo, futhi usola ibandla leCCC esithi belihlukuluza amalunga enhlanganiso yakhe.
"Silokudana okukhulu ngokuziphatha kwebandla leCCC ngesikhathi sokhetho behamba behlukuluza amalunga eFAZ ngoba besilohlelo lwethu ebesilwenza njalo lusekelwa yisisekelo sombuso buye besilandele iziqiniseko zesisekelo."
Inengi selimelele impumela yalolukhetho ngamehlo abomvu, ikakhulu eyokhetho lukaMongameli.
Forum