Udaba lwamapholisa aseZimbabwe aseqalisile ukuvota ngeposo soludale inkulumo, abebandla eliphikisayo leCCC besithi amapholisa la abanjwa ngamandla ukuthi avote phambi kwabakhulu bawo njalo avotele ibandla leZanu PF.
Kumbiko awethule enkundleni yeTwitter ngoLwesithathu umkhokheli weCCC uMnu Nelson Chamisa uthe lokhu yikuganga okungekho emthethweni. Ngokunjalo, uthe ibandla lakhe alisoze liyamukele impumela yokuvota okunje.
I-CCC ithi ibingazi lutho ngaloluhlelo ngoba iZimbabwe Electoral Commission (ZEC) ayizange iyitshele ukuthi amapholisa asevota ukuze ithumele abantu bayo ukuyahlola ukuthi kuvotwa ngemfanelo na.
Umgcinisihlalo weZEC uNkosikazi Priscillah Chigumba utshele intathelizindaba ngoLwesithathu ukuthi ngempela amapholisa azasebenza ngesikhathi sokhetho aseqalisile ukuvota ngeposo, kodwa uthe amabandla ezombusazwe kavunyelwa ukuthumela abantu bawo ukuyahlola lolukhetho.
Umsakazo weStudio 7 uzamile ukuxhumana loChigumba kanye lesikhulumeli samapholisa uMnu Paul Nyathi ngokuphoqwa kwamapholisa ukuthi avotele ibandla elibusayo kodwa ababili laba bebengadobhi incingo zabo.
“Sihambile endaweni ezithize sabona kulobufakazi obubambekayo bokuthi amapholosa ebevota etshelwa ngabakhulu ukuthi votelani laphayana,” kutsho umsekeli wesikhulumeli seCCC uMnu Felix Magalela Mafa.
“Kodwa ngeke sethuse inyoni ngokuveza ukuthi sikubone lapha lalaphaya ngoba bengabugqibela ubufakazi… maduze sizahamba emthethwandaba siyebuveza lobo bufakazi.”
Your browser doesn’t support HTML5
Ingxoxo loMnu Joseph Tshuma
Khepha ilunga leZanu PF Central Committee uMnu Joseph Tshuma ukulandule lokhu esithi ngamanga aluhlaza akhulunywa yiCCC.
“Loludaba mina ngibona angani yikwesaba umnyama ongelampisi. Akulapholisa elibanjwa ngamandla nxa livota ngoba sesibonile kanengi amapholisa evota, evotela ibandla lelo elikhalayo futhi namhlanje,” uMnu Tshuma utshele iStudio 7.
Your browser doesn’t support HTML5
Ingxoxo loMnu Joseph Tshuma
UMongameli Emmerson Mnangagwa uke wakhonona kumaviki asanda kwedlula esithi abezomvikela ababona ngokulondolozwa kwamajele balomkhuba wokuvotela amabandla aphikisayo, khona athi akumelanga kwenzeke kukhetho oluzakwenziwa ngeviki ezayo.
Ukhetho lolu luzaqhutshwa elizweni lonke mhlaka 23 kudingwa amakhansila, amalunga edale lePhalamende kanye loMongameli welizwe, lapho uChamisa azangqikilana khona loMongameli Mnangagwa, yena omela ibandla leZanu PF.