WASHINGTON DC – Ibandla leCCC lithi amalunga alo agile imikhuba abhalisa eNomination Court ukuthi azancintisa kukhetho oluzayo elimele kodwa esazi mhlophe ukuthi ayisiwo akhethwe ngabantu, kumele ayecitshisa amagama awo usuku lwanamuhla lungakedluli nxa engafuni ukubotshwa.
Abantu laba bangamatshumi amane lanye, 41.
Ukubhalisa kwabasolwa phezu kwabantu ababhaliswe libandla labo kutsho ukuthi endaweni lezi kulamalunga eCCC amabili endaweni ngayinye kumbe edlula khonapho ancintisayo efuna isikhundla esifanayo, okuyinto esike yadala ukuthi ibandla leZanu PF linqobe kalula lapho okuke kwaba lesimo esifanayo kukhetho olwedluleyo.
Isikhulumeli seCCC uNkosazana Fadzayi Mahere ubethe abasolwa ngamagama wabaxwayisa ukuthi bayecitshisa amabizo abo kungakedluli amahola angamatshumi amabili lane, 24 hours, kusukela izolo.
Ababhalisele ukuncintisa kukhetho lwamaluga ePhalamende bangamatshumi amabili kuthi ababhalisele ukuncintisa kukhetho lwamakhansila bona bangamatshumi amabili lanye, 21.
UMahere uthi babikela ikomishini ebona ngokuqhutshwa kokhetho, iZimbabwe Electoral Commission (ZEC) kodwa ayikathathi manyathelo futhi uthi bamangala lasemapholiseni.
I-CCC ithi abantu laba basetshenziswa liqembu elisekela ibandla leZanu PF elibikwa likhokhelwa ngamaCIO eleFAZ, ngenjongo yokwehlukanisa amavoti eCCC ukuze kunqobe iZanu PF.
Kodwa abeFAZ bayakulandula lokhu.
Umsekeli wesikhulumeli seCCC uMnu Felix Magalela Mafa Sibanda utshele iStudio 7 ukuthi abangasoze bayecitshisa amagama abo bazabhekana lengalo yomthetho.
Your browser doesn’t support HTML5
Ingxoxo loMnu Felix Magalela Mafa Sibanda
Kodwa omunye wabantu laba obhalisele ukuncintisa kukhetho lokudinga umeli wePumula edale lePhalamende uMnu Albert Mhlanga uthi kakayitholi incwadi evela kuCCC.
Your browser doesn’t support HTML5
Ingxoxo loMnu Albert Mhlanga