VICTORIA FALLS - Inhlanganiso yabatsha eyeYouth Invest ngoMvulo imanyane lezinye ezizimeleyo kanye lohlangothi lwezemfundo eVictoria Falls emkhosini wokunanza usuku lokulwisana lokusetshenziswa kwezidakamizwa olweInternational Day Against Drug Abuse and Illicit Trafficking.
Kunkulumo eziphume emkhosini lo obuqhutshelwa esikolo seMosi-Oa-Tunya High School, abasakhulayo baveze ukuba inengi labo selithatha izidakamizwa lezi ezigoqela icrystal meth, intshengu, osikanka kanye lokubhenywa kuthathwa kuma pamper abantwana alengcekeza kubangelwa yikukhohliswa ngabanye.
Phezu kwenkohliso, baveze ukuba okunye bakubona ezindlini kusenziwa ngabomdeni njalo abanye bakwenziswa yikuhlukunyezwa emakhaya.
“So sicina sibona ukuthi okungcono yikuthi ngibheme ukuthi ngingahamba endlini ngiyafika ngizihlalele kumbe ngilale, so okwenzakala endlini uyabe ungasekho kikho.”
UNkosikazi Ruth Mpofu, umphathi weGuidance and Counselling esikolo lesi, utshele umsakazo lo ukuba abantwana basebenzisa izidakamizwa lezi nsuku zonke. Uthi ziyabalimaza.
“Ngoba nxa ukhuluma ngamaphaphu abo, bakutshela ukuthi vele kusiyafika leso sikhathi ngiyabe sengifile.Bazibona nje bengabantu abayaphila iminyakana engamingaki khonalokho ukuthi abanye ba child-headed abanye abazali batshona abanye betshoniswa yiwo amadrugs. oBrocho bagcwele la, imbanje zigcwele, ontshenngu asikhulumi vele bagudla kikho ekuseni lantambama kuyathwala ezigujaneni, suzabona ngokuhleka kwakhona ukuthi hayi kanti yindaba lina bantwana besesiyababamba nje.”
UNkosikazi Nokuthaba Moyo, owenhlanganiso yeYouth Invest, uyalufakaza loluhlupho.
Ama students asesehluleka ukufunda kuhle, njalo ezikolo lezi kulabanye abafundi abathatha ama drugs njalo sebephambanisekile ngoba impilo zibhidlizwa besabancane.”
Inkulumo kaNkosikazi Moyo igcizelelwe nguMnumzana Kelvin Moyo, umgcinisihlalo weVictoria Falls Combined Residents’ Association.
“Singavimba indlela ama drugs la eza ngayo loba phandle kwelizwe kumbe kwamanye amadolobho, ngibona angani kungasinceda singakadingisisi ukuthi bona ngobani abawathengisayo njalo ahamba njani, afika njani ebantwaneni.Singaqeda uhlupho lolo besisisithi imfundiso kufanele ihlale isibakhona kungabiyikuthi namuhla lilanga le campaign against drug abuse.”
UNkosikazi Mpofu ukhala ngokuthi abomthetho kababophi ngemfanelo labo abathengisa izidakamizwa lezi.
“Uhlupho nje silahlwa ngabomthetho. Abasincedisi okuzwayo bayabuya sibili amapholisa bebafundise abantwana kodwa abantu abenza khonalokho bayakwazi.”
Ngomyaka ophelileyo, uhlangothi lweYouth, Sport, Arts and Recreation luveze ukuba inani lentsha eledlula amatshumi amahlanu ekhulwini - 57.1 percent yakuleli ithatha izidakamizwa. Kulandela lokhu, uhulumende wahlomisa abomthetho ukuphemba laba kanye labathengisayo. Sekubotshwe abedlula inkulungwane ezedlula itshumi lambili.
Lonyaka umkhankaso lo kuzwekazi lonke uqhutshwa phansi kwwesihloko esithi ‘People First: Stop Stigma and Discrimination, Strengthen Prevention’.
Forum