WASHINGTON DC - Uhulumende ngoLwesithathu usungule umkhankaso wokulwisana lodubo lokungeniswa kwabantu lokuphuma kwabo ngudlu eZimbabwe; abanye bethengiswa yizigilamkhuba kwamanye amazwe, i-human trafficking ngesiNgisi.
Uhlelo lwe-2025-2028 Zimbabwe Anti-Trafficking in Person National Plan lolu, lusungulwe ngumsekeli kaMongameli welizwe uMnu. Constatine Chiwenga eHarare .
Uhulumende uthi nyakenye uhlenge abesifazane labantwana abedlula ikhulu, 131, ababehanjiswa emazweni atshiyeneyo ngaphandle komthethi yizigebengu, ama-human traffickers.
Uhulumende weMelika wethule ugwalo nyakenye oluveza ukuthi udubo lolu lubhaha kakhulu eZimbabwe.
Banengi abantu abatholakala sebesetshenziswa njengezigqili kumbe sebesetshenziswa ukuthengisa imizimba, ngemva kokuhanjiswa emazweni behugwe ngokuthenjiswa imsebenzi lempilo engcocno yizigilamkhuba.
Ingcwethi ecubungula ezombusazwe uMnu. Effie Dlela Ncube, utshele iStudio 7 ukuthi, "Ukuhanjiswa kwabantu emhlabeni laphakathi kwelizwe ngokungekho emthethweni yinto embi kakhulu, ebuhlungu njalo enzakalayo eZimbabwe."
"Banengi abantu abathethwe besiywa eGoli, bethenjiswe imisebenzi, besiya eMelika begcina bese-Middle East, bagcine bese-Asia, bagcine besezindaweni lapho abavalelwe khona, bathathelwe ama-passport babeyizigqili, emsebenzini besebenza bengaholi, basetshenziswe ukuthengisa imzimba, ukuze labo ababasebenzisayo bazuze imali." Kutsho uMnu. Ncube.