WASHINGTON DC - Ibandla leZanu PF lithi lizaphinda ukhetho lwalo lokudinga abazalimela kukhetho lwelizwelonke ezigabeni ezinhlanu ngoba ama-primaries eliwaqhube kumaviki amabili edluleyo kaqhutshwanga ngemfanelo.
Izigaba lezi zigoqela eseInsiza North lapho umeli walesisigaba ephalamende uMnu Farai Taruvinga azabhuqana khona okwesibili lowayengusikomitshi wekhomishini yezokhetho iZimbabwe Electoral Commisison (ZEC), uMnu Qhubani Moyo.
UTaruvinga wanqoba kukhetho lwakuqala kodwa uMoyo wakhonona ngokuthi waqilibezelwa. Ukhetho lolu luzaphindwa njalo eGokwe-Nembudziya, eZvimba West kanye lesezigabeni zeHarare ezimbili ezibalisa eMbare laseChuru.
Abasekeli beZanu PF abanengi bakhonona kakhulu ngosuku lokhetho besithi bavinjwa ukuvota ngoba kuthiwa amagama abo ayengekho kungwalo zebandla.
Kodwa ilunga leZanu PF Central Committee uMnu Joseph Tshuma utshele iStudio 7 ukuthi lanxa kulokukhonona lapha lalaphaya, ukhetho lwabo lwahamba kuhle njalo impumela yalo iveza izifiso zabasekeli bebandla.
Your browser doesn’t support HTML5
Ingxoxo loMnu Joseph Tshuma