Kambe uhulumende uzasifeza na isithembiso sokujezisa bonke abathinteke kuvideo ye al jazeera eyenkohlakalo?
Umphathintambo wezokwethulwa kwemibiko, uNkosikazi Monica Mutsvangwa uthe bayaqakathekisa okuphume kuvideo ye Al Jazeera njalo abazatholakala belesandla kunhlelo zenkohlakalo bazajeziswa.
Ugcizelele esithi bonke abazikhathekisayo bezitshaya isifuba ngokuhudula igama likamongameli welizwe bazajeziswa.
Kodwa ihlandla lakuqala lolumfanekiso we documentary laphuma kumaviki amabili adluleyo kungela ngitsho loyedwa owathathelwa amanyathelo.
Umka mongameli welizwe, uNkosikazi Auxillia Mnangagwa lendodana yakhe uEmmerson Junior labo kubikwa amazwi abo ekhona kuhlandla elizalandela lalumfanekiso.
Sixoxe lengcwethi ecubungula ezombusazwe, uMnu. Mqondobanzi Magonya ukuze sizwe imbono yakhe ngaloludaba.
Lokhe sikudaba lunye, uzulu seveze imbono etshiyeneyo phezu kophenyo uhulumende athi soluvulwe ngamapholisa phezu kwefilimu ethulwe ngumsakazo we Al Jazeera ebikwa iveza imisebenzi yenkohlakalo ekutshontshweni kwegolide kuleli kanye lekungenisweni kwemali engcolileyo etholakale ngendlela ezingekho emthethweni, i-money laundering ngesingisi, ihlambululwe ngokusetshenziswa emphakathini.
UNtungamili Nkomo we Studio Seven uxoxe locubungula ezombusazwe uMnu Difa Wajapi Bango Dube.