WASHNGTON DC - UMongameli weMelika uMnu Joe Biden usethembise abakhokheli bamazwe eAfrica ukuthi uzakwenza konke akwenelisayo ukuze umanyano weAfrican Union (AU) ungene kunhlanganiso yamazwe anothileyo eyeG20, ube lilunga eligcweleyo.
UBiden wethule amazwi la ngoLwesine egqiba umhlangano awenze labakhokheli bamazwe eAfrica oqhutshelwe esigodlweni seMelika, iWashington DC, oweU.S.-Africa Leaders’ Summit.
Ngakolunye uhlangothi, umgcinisihlalo weAU njalo enguMongameli weSenegal uMnu Macky Sall, uthe uMongameli Biden kumele esule izijezizo athi zetheswa eleZimbabwe ngeleMelika ngoba ziphambanisa ingqubelaphambili yeZimbabwe kanye lobudlelwano obuhle phakathi kwamazwe aseAfrica leMelika.
UMongameli weMelika uMnu Joe Biden elomgcinisihlalo weAfrican Union (AU), onguMongameli njalo weSenegal uMnu Macky Sall (okwesokudla) besemhlanganweni weU.S.-Africa Summit eWashington DC.
EleMelika lona lithi izijeziso lezi zithinta amalunga eZanu PF kuphela, agoqela uMongameli Emmerson Mnanagwa hatshi uzulu makhaza. UMnangagwa kanxuswanga kulumhlangano ngenxa yalezizijeziso.
NgoMvulo, iMelika yethese indodana yakhe izijeziso labanye isithi baphatheke kumisebenzi yenkohlakalo.
Ethembisa ukusebenzelana kuhle lezwekazi leAfrica, uBiden uthe kuqakatheke kakhulu ukuba iAU ibe lesabelo kuG20 ngoba kunengi okungatholwa ngamazwe eAfrica kulinhlanganiso, yona elamazwe agoqela iMelika, Canada, China, France, Germany, Britain, South Africa, leIndia.
Umhlangano weU.S.-Africa Leaders Summit uhlanganise abakhokheli bamazwe aseAfrica loMongame weMelika uMnu Joe Biden.
UBiden uthembise njalo ukuthi ilizwe lakhe lizancedisa izwekazi leAfrica ngenhlelo zentuthuko. Lelizwekazi lilohlelo lweziloyiso zentuthuko elithi likhangelele ukuzigcwalisa kusiyafika umnyaka ka2063 olubizwa ngokuthi yiAgenda 2063.
Your browser doesn’t support HTML5
Amazwi kaMongameli Joe Biden
NgoLwesithathu uMongameli Biden uthe iMelika izakupha amazwe aseAfrica imali ekhangelane lenhlelo zentuthuko engena kumabhiliyoni angamatshumi amahlanu lanhlanu, US$55 billion.
Ingcwethi kwezombusazwe uMnu Rejoice Ngwenya utshele iStudio 7 ukuthi iyancomeka kakhulu imizamo kaBiden yokuthi izwekazi leAfrica lamukelwe kumanyano wamazwe athuthukileyo oweG20.
Your browser doesn’t support HTML5
Ingxoxo loMnu Rejoice Ngwenya