WASHINGTON DC - UMongameli weMelika uMnu Joe Biden uthi ilizwe lakhe lizakupha amazwe aseAfrica amabhiliyoni angamatshumi amahlanu lanhlanu amadola, US$55 billion, phakathi kweminyaka emithathu elandelayo eqondane lokuqhuba inhlelo ezigoqela ukulwisana lendlala, ukuthuthukisa ezempilakahle, ukuvimba ukukhudumala komkhathi, lokunye okutshiyeneyo.
UBiden uveze lokhu ngoLwesithathu emhlanganweni awenze labakhokheli bamazwe eAfrica oqale ngoLwesibili eWashington DC, oweUS-Africa Leaders' Summit, lapho athembise khona njalo ukuthi ilizwe lakhe lizimisele ukusebenza libambisane kuhle lezwekazi leAfrica.
Umhlangano lo uphela ngoLwesithathu.
Uthe iMelika izakupha njalo imali inhlanganiso ezizimeleyo eziqhuba inhlelo zokulondoloza amalungelo oluntu, ukuvuselela amafekithali, ukuthuthukisa inhlelo zabesifazana lokunye.
UBiden uphinde wathi uzazama ngamandla wonke ukuba iAfrica ingene kumanyano wamazwe athuthukileyo, oweG20, ukuze lelizwekazi libe lelizwi kunhlelo eziphatha umhlaba wonke jikelele ezigoqela ezentuthuko.
UMongameli Biden uthe kunengi azakwenzela iAfrica okufana lokulwiswana lamalwecatsha kanye lemikhuhlane etshiyeneyo.
Wengeze wathi kulenhlanganiso ezinengi lamankampani eseMelika afisa ukudlelana lezwekazi leAfrica.
Ngokunjalo, uBiden uthe kuleUS$15 billion ezaphiwa amankampani lenhlanganiso ezizimeleyo zeMelika ezifisa ukusebenzelana lezaseAfrica.
Akwaziwa ukuba eleZimbabwe lizatholani emalini ekhulunywe nguBiden le.
Olandela ezombusazwe uMnu Raphel Mthombeni utshele iStudio 7 ukuthi ngokuqoqa lumhlangano labakhokheli beAfrica, iMelika isizama ukuzisondeza kunotho yeAfrica.
