WASHINGTON DC - Ibandla leCCC lithi lizakwenza umhlangano lentathelizindaba namuhla lapho elizachasis khona mayelana ngokuphiwa kwamalunga alo edale lephalamende imali engena kuzinkulungwane ezingamakhulu amane zamadola akweleMelika, US$40,000 ilunga ngalinye nguhulumende, okuyinto ecunule abanengi.
Lumhlangano uzakwenzelwa eBronte Hotel eHarare.
Umhlangano lo ulandela omunye obuphakathi komkhokheli weCCC uMnu Nelson Chamisa lamalunga ephalamende la izolo lapho okuhlafunwe khona loludaba kabanzi uChamisa waveza insolo yakhe njalo amalunga ephalamende lawo emchasisela ukuthi kungani eyithethe limali.
Limali yaphiwa amalunga wonke ephalamende, agoqela wona aweCCC, aweMDC-T kanye lawebandla leZanu PF. Uhulumende uthi limali yizikwelede zokuncedisa amalunga ephalamende ukuthi akhe kumbe athenge izindlu.
Amalunga la athatha limali azithulela zwi angani akwenzakalanga lutho, udaba lolu lwaze lwavumbululwa zintathelizindaba. Kulapho uChamisa aqala khona laye ukusola amalunga ebandla lakhe esithi aphambanisile.
Abaphathintambo bakahulumende bona baphiwa ingxenye yesigidi ngamunye, US$500,000, kwathi abasekeli babo bathola inkulungwane ezingamakhulu amathathu, US$300,000. Uhulumende usolwa kakhulu ngabanengi abathi udlalise imali ebingaphathisa ilizwe kundaba zokutholisa uzulu amagetsi aneleyo lokunye okutshiyeneyo.
Kodwa ohlaziya ezombusazwe uMnu Mqondobanzi Magonya utshele iStudio 7 ukuthi nxa kungelamthetho owephulwa nguhulumende lamalunga ephalamende ekuphaneni limali, akulalutho olubi.
Your browser doesn’t support HTML5
Ingxoxo loMnu Mqondobanzi Magonya