WASHINGTON DC - Ibandla leMthwakazi Republic Party (MRP) lithi lanxa amapholisa ebelivumele ukwenza umhlangano eMzimuni Business Center, esiqintini seGwanda namuhla, induna yesigaba uMasuku ulivimbile ngoba esithi ulowakhe umhlangano azawenza ngesikhathi esifanayo.
Lelibandla lithi lokhu kube yisimanga kulo ngoba linduna yathi itshelwa ngomhlangano walo, kayizange iphikise kumbe itsho ukuthi yayihlele owayo umhlangano.
“Besiwatshelile amapholisa njalo lencwadi yokusivumela siyiphethe,” kutsho umkhokheli walelibandla uMnu Mqondisi Moyo.
UMoyo wengeze wathi uMasuku ubikwa eqoqe ukuhlangana labenhlanganiso ezizimeleyo eHall lapho ibandla lakhe ebelimele lenzele khona umhlangano walo.
Kodwa uthe lokho akusoze kubephule umoya ngoba bezimisele ukuqhubeka bekhankasela ukhetho oluzayo kungelani lokuthi bayavinjwa kumbe bahlangana lengxaki bani.
