WASHINGTON DC - Izakhamizi ezigabeni eziyisithupha ezigoqela eInsiza laseMatobo lapho okuqhamuke khona udlakela ekuqaleni kweviki bezivota ngoMgqibelo kukhetho lokudinga amakhansila.
Ababephethe izikhundla lezi babhubha kwathi abanye batshiya umsebenzi.
Abogatsha lweZimbabwe Electoral Commission (ZEC) labenhlanganiso ezizimeleyo ezifana leZimbabwe Election Support Network (ZESN) leElection Resource Center (ERC) bathi lolukhetho luqhutshwe ngokuthula kuzo zonke indawo ezibalisa khona eInsiza, Matobo, Mutare, Guruve, Takawira kanye laseBuhera.
Kodwa abebandla leCCC labeERC bathi kulabantu ekade bebhala amabizo alabo abavotayo phandle kwezinye izititshi zokuvotela, okuyinto abayisolayo kakhulu abathi ibisenziwa ngamalunga ebandla leZanu PF.
AbeZanu PF bona bayakulandula lokhu. I-CCC ithi njalo kwezinye izititshi eMatobo abebandla leZanu PF bahambe bayahlala duzane lama-polling stations babukisa impahla zebandla labo.
I-ZESN layo ikufakazile lokhu. Kodwa isikhulumeli sekhomishini ebona ngokuqhutshwa kokhetho, eyeZEC uMnu Jasper Mangwana utshele iStudio 7 ukuthi ngokwazi kwabo ukhetho lolu luqhutshwe kuhle.
Impumela yalolu khetho ikhangelelwe ukwethulwa ntambama ngoMgqibelo kumbe ngeSonto. Isikhulumeli seCCC eMatabeleland South uMnu Ntando Ndlela uthi lanxa kube lodlakela, bakhangelele ukunqoba.
Your browser doesn’t support HTML5
Ingxoxo loMnu Ntando Ndlela
Sixoxe njalo lelunga leZanu PF Central Committee uMnu Joseph Tshuma yena othi labo bakhangelele ukunqoba endaweni zonke eziyisithupha.
Your browser doesn’t support HTML5
Ingxoxo loMnu Joseph Tshuma