UMongameli Emmerson Mnangagwa ngoLwesihlanu uvule okusemthethweni isikolo sokuqeqesha odokotela ekolitshini leGreat Zimbabwe University eMasvingo.
UMnangagwa uthe kuqakathelile ukuba ilizwe libe labezempilakahle abanengi ukwenzela ukuthuthukisa uzulu.
Ikolitshi leli, elibizwa ngokuthi yiSimon Mazorodze School of Medical and Health Sciences, ngelesine lamakolitshi kahulumende aqeqetsha odokotela kwele Zimbabwe.
Amanye agoqela eleUniversity of Zimbabwe, iNational University of Science and Technology, leMidlands State University.
Okwamanje ilizwe likhangelane lodubo lokuswelakala kwabodokotela labongikazi, abahlezi bekhalala kanye lokutshiya imsebenzi ngenxa yokungahlawulwa ngemfanelo.
Abanengi balubhekisa emazweni angaphandle, lapho abahlawulwa khona kangcono.
IStudio 7 ixoxe loMnu. Joseph Tshuma, omunye wamalunga eCentral Committee yebandla le-ZANU-PF, othe bemukela ngenjabulo intuthuko enziwa nguhulumende kaMnangagwa.
“Njengesithembiso esenziwa ngumongameli wethu oweZimbabwe ubaba uMnangagwa ukubana kusukela engena ehofisini, sokuntshintsha ama-gear. Sesisuka entweni zokupolitika ngezikhathi zonke. Sesingena ku-developmental attitudes and gear.
“Kuyatshengisela ke ngendlela asebenze ngayo since engene embusweni. Sesimbonile ukubana ulokhe ezama ngamandla akhe wonke ukubana alungisise izinto ebezinga lunganga. Khangela imgwaqo iyakhiwa, khangela amadamu ayakhiwa ngobunengi bawo. Khangela amagetsi; kuyazameka ukubana lawo afakwe, abekhona. Nanko eHwange unit 7, loUnit 8 kuyakhiwa. Kusakhulunywa ngale kubo Batoka Gorge ngale lakho futhi konke lokho.”
UTshuma ugcizelele esithi, “Namuhlanje sikhuluma kanje so, uPresident useMasvingo eGreat Zimbabwe University lapho avula khona iSimon Mazorodze School of Medicine.”
UTshuma uthe khonokho kutshengisela impumela lokuhambela phambili okwenziwa nguMongameli Mnangagwa ekuthuthukiseni ilizwe.
Sibuye saxoxa njalo loMnu. Effie Dlela Ncube, ingcwethi yezombusazwe ezimeleyo, othe, “Lanxa kukuhle ukuthi kube lezikolo ezinengi zokufunda. Ukufundela ubudokotela, ukufundela ubunesi, ubugqwetha, ukuba ngu-accountant. Okukhulu yikuthi abantu labo nxa sebefundile, bayithole imsebenzi ebhadala imali eyeneleyo eyenza ukuthi bakwazi ukondla abantwababo. Ungakhanela khathesi; odokotela bathwele nzima kakhulu. Kabaholi lutho.
“Bayehluleka ukufundisa abantwana; bayehluleka ukwenza noma yini, sengathi azange bayafunda ezikolo. Ngakho-ke, yikho okuqakatheke kakhulu khonalokho ukuthi kulungiswe umnotho, okwedlula nje ukube kuvulwa nje izikolo lapha lalaphana; ngoba kulula phela ukuvula izikolo kuyo yonke indawo. Ungazivula, uzivule, uzivule, kodwa ubuzo uthi; lezo zikolo zilethani kulabo abayabe sebefundile kuleyo ndawo?”
UNcube uthe kudingeka ukuthi labo abazabe sebefundile bathole insebenzi, njalo bahole imali enengi ehambisana lemfundo yabo, lemsebezi abayabe beyenza.
Uthe kuyadanisa ukubona labo abafundileyo, abaqatshwe nguhulumende kabatholi mali.
UNcube uthe lokhu kubangelwa ngumkhonomi ongamanga kuhle ngenxa yepolitiki yakuleli layo engaqondanga.