WASHINGTON DC - Uhulumende uthi uyazisola ngokukhipha ihawu ebeliluphawu lwegceke lendizamtshina, eleJoshua Mqabuko Nkomo Airport koBulawayo, engakhulumisananga lozulu.
Kumbiko awethule ngoLwesine, umphathintambo obona ngenhlelo zokuhambisa, owe-transport, uMnu Felix Mhona, uthe kwaba liphutha ukwenza lokhu, kodwa uthe balikhipha lelihawu ngoba labunjwa ngendlela engelahlonzi.
Uthe vele lifakwa njengophawu lwaleligceke ngo2013, injongo yayingeyokuthi lihlale okwesikhatshana nje. Ihawu leli belilenduku lomkhonto, okuyikhali kumbe impawu ezibaluleke kakhulu embalini yaMaNdebele.
Uhulumende ususe ihawu leli ekuqaleni kweviki wafaka ibhakane elilophawu lwesizwe seZimbabwe, lona olulenyoni, i-court of arms ngeSingisi.
Le yinyo ecunule uzulu, ikakhulu oweMatabeleland, esithi lokhu yikweyisa amasiko esiNdebeleni kanye laye umuyi uMnu Joshua Nkomo.
Kodwa uhulumende uthi lalo lelibhakane aselifakile lizakhitshwa ngoba esephakathi kokukhulumisana lemuli kaNkomo labanye, ikakhulu abosiko ukuze kuphunywe lophawu oluzakwamukelwa ngumuntu wonke.
Ukhansila webandla leCitizenc Coalition for Change (CCC) koBulawayo uMnu Edwin Ndlovu uthi lanxa ekwamukela ukuzisola kukahulumende, ihawu kumele libuyiselwe.
Your browser doesn’t support HTML5
Ingxoxo loMnu Edwin Ndlovu
Ilunga leZanu PF uMnu Joseph Tshuma laye umsolile kakhulu uhulumende ngalokhu esithi wenza ubuwula obukhulu ngoba engazange akhulumisane lozulu.
Your browser doesn’t support HTML5
Ingxoxo loMnu Joseph Tshuma