WASHINGTON DC - Sokuqhamuke ukufuthelana phakathi kukazulu weMelika phezu kwesinqumo sedale leSupreme Court esizakwesula ilungelo labesifazana lokukhipa izisu.
Lanxa linkantolo ingakasethuli lesisinqumo, sesisaziwa nguzulu jikelele kulandela ukubika kwephephandabeni lePolitico, lona eliphinde lasifaka ebulenjini be-internet ngokugcweleyo izolo.
Kunakanelwa ukuthi kulesisebenzi salinkantolo esisithumele intathelizindaba, okuyinto ecunule umahluli omkhulu, uChief Justice John Roberts, yena osevule uphenyo.
Isinqumo lesi sesula leso ebesisipha abesifazana ilungelo lokukhipha isisu esethulwa yinkantolo efanayo ngo1973 kudaba olwaziwa kakhulu ngokuthi yiRoe vs Wade.
Isinqumo lesi sesiphehle ukudlephana okukhulu phakathi kwabebandla lamaRepublicans, bona abasisekelayo kanye lamaDemocrats, wona athi inkantolo yenze iphutha.
UMongameli Joe Biden laye wethule umbiko echothoza iSupreme Court esithi iyaphambanisa ngokuthathela abesifazana ilungelo elibalulekileyo lokuzikhethela ukuthi bayamfuna na umntwana kumbe hatshi.
Udaba lolu lukhangelelwe ukuba lomthelela kukhetho lwamalunga ephalamende ekupheleni komnyaka.
Osebenza kwezempilakahle eMelika uNkosazana Brenda Moyo utshele iStudio 7 ukuthi isinqumo senkantolo lesi sicunule abesifazana abanengi.
Your browser doesn’t support HTML5
Ingxoxo loNkosazana Brenda Moyo