WASHINGTON DC – UmkaMongameli waseMelika uNkosikazi Jill Biden uzakwethekelela izizalwane zakweleUkraine eziphephele kweleRomania lakweleSlovakia ngosuku lweMothers’ Day ngeSonto.
UNkosikazi Biden uthi njengomama, uyabuzwa ubuhlungu obubhekane labantu baseUkraine abathwele nzima ngempi eqalwe yiRussia.
Limpi isibangele ukuthi abantu abedlula izigidi ezinhlanu, 5.5 million babaleke kweleUkraine bayaphephela emazweni atshiyeneyo, ikakhulu asezwekazi leEurope.
UMongameli Joe Biden ngeviki edluleyo ucele iphalamende yeMelika ukuthi ipasise isikhwama sokuphathisa eleUkraine eseUS$33 billion ezasetshenziswa ukuthenga izikhali kanye lokunakekela uzulu othintwe kubi yilimpi.
Ohlaziya ezombusazwe uMnu Difa Dube utshele iStudio 7 ukuthi uhambo lukaNkosikazi Biden lolu ngosuku lweMothers’ Day luqakathekile ngoba lujonge ukutshengisa iziphepheli zaseUkraine ukuthi eleMelika lima lazo.
