EzeZimbabwe

UNICEF: Likhwelile Inani Labantwana Abangasayi Esikolo eZimbabwe Ngenxa Yobuyanga

  • Ntungamili Nkomo

Schoolchildren wait to enter their school in Harare, Zimbabwe, Monday Sept, 28, 2020. Zimbabwe schools have reopened in phases, but with smaller number of pupils, more teachers and other related measures to enable children to resume their education withou

WASHINGTON DC - Ugatsha olubona ngenhlalakahle yabantwana kumanyano weUnited Nations olweUNICEF, luthi abantwana abayisilinganiso samatshumi phose amahlanu ekhulwini, 47 percent, eZimbabwe abasayi esikolo ngenxa yobuyanga.

Okwenze umumo waba mubi ngamandla, kutsho iUNICEF, ngumkhuhlane leCovid-19 obangele ukuthi abantu abanengi balahlekelwe yimisebenzi.

Intathelizindaba yeVOA uColumbus Mavhunga ubike ukuba ugwalo olwethulwe yiUNICEF izolo luveza ukuthi kungakabi leCovid-19 eZimbabwe, isilinganiso sabantwana ekade besehluleka ukuya esikolo ngokuswela imali besikumatshumi amabili lanye, 21 percent kuphela. Kodwa lelinani selikhwele laya ku47 percent.

Isikhulumeli sogatsha lwezemfundo uMnu Taungana Ndoro utshele uMavhunga ukuthi ubengeke atsho lutho ngamanani akhulunywa yiUnited Nations la ngoba edinga isikhathi sokuwakhangelisisa.

Lumbiko uphuma ngesikhathi ilizwe lilungiselela ukuvula izikolo ngeviki ezayo njalo abazali abanengi bekhala ngokuthi abalayo imali yama-school fees.

Abanye ababalisi labo bathi abasoze baye emsebenzini nxa uhulumende engabengezelelanga iholo.