WASHINGTON DC - Isilinganiso sokuwa kwedola leZimbabwe, i-year-on-year inflation, isikhwele yaya phose kukhulu, 96.4 percent, ngokubika kogatsha lukahulumende olubona ngezamanani olweZimbabwe National Statistics Agency (ZimStats).
Lokhu kutsho ukuthi intengo yezinto ezitolo ikhwele nge96.4 percent kusukela ngoMabasa emnyakeni odluleyo kuze kufike namuhla.
I-ZimStats ithi njalo nxa kukhangelwa inyanga ngenyanga, i-month-on-month inflation, intengo yempahla ikhwele isuka kokuyisithupha, 6.3 percent ngoMbimbitho yaya ku15.5 percent kulinyanga.
Ithi njalo umuntu oyedwa usedinga amadola azinkulungwane ezedlula kancane eziyisitshiyangalombili, ZW$8,366.00 yokuthenga ukudla ngenyanga.
Nxa isihlangene lezinye indleko ezitshiyeneyo iba zinkulungwane ezilitshumi lanye, ZW$11, 363. Lolugatsha alusatshongo ukuthi umndeni wona usudinga malini ngenyanga.
Ingcwethi kwezenotho zithi ukukhwela kwentengo yezinto lokhu kuveza sobala ukuthi uhulumende uyehluleka ukuluphatha kuhle udaba lomnotho nanku idola leZimbabwe liqhubeka lilahlekelwa luhlonzi nxa liqathaniswa ledola laseMelika.
Emkambo oqhutshwa yiReserve Bank of Zimbabwe oweForeign Exchange Auction izolo, idola leMelika elilodwa belithengwa ngamadola eZimbabwe alikhulu elilamatshumi phose ayisithupha, 1:159.
Kodwa emkambo wensitha, oyiwo osetshenziswa ngabamabhizimusi, idola leMelika elilodwa lithengwa ngamadola eZimbabwe aphezu kwamakhulu amathathu, 1:300 kusiya ku350.
