WASHINGTON DC - Uzulu usele ekhuza umhlola ngemva kokuba iZimbabwe Electoral Commisson (ZEC) ithe kulabantu abazinkulungwane ezintathu, 3,253, abaleminyaka yokuzalwa esuka kwelikhulu lanye, 101 years, kusiya kwedlula ikhulu elilamatshumi amabili, 120, ababhalisele ukuvota kukhetho luka2023.
Iloba enkundleni yeTwitter, likhomishini ithe bedlula inkulungwane ezintathu, 3,112, abantu abaleminyaka esuka kwengu-101 kusiya kwengu-110 abakuluhlu lwe-voters roll kuthi abaleminyaka esukela ku-111 kusiya kwengu-120 years bangu-130.
Kodwa lokho ayisikho okuphehle inkulumo!
Okwenze ababengi babamba owangaphansi yikuthi iZEC - okuyikhomishini ebona ngokuqhutshwa kokhetho eZimbabwe - yengeze yathi kulabanye njalo abaleminyaka ephezu kwelikhulu elilamatshumi amabili, 120 years, abalitshumi lanye, 11, labo abazavota kukhetho oluzayo.
Le ibe yimbedumehlwana enkulu ngoba abagcina imbali yezehlakalo ezingavamanga emhlabeni jikelele abeGuinness World Records bathi akekho umuntu oleminyaka efika kuleyo ophilayo.
Bathi umuntu omdala ukwedlula abanye bonke emhlabeni okwamanje yisizalwane sakweleJapan, sona esileminyaka engu-118.
Abanengi abalobe kuTwiter bephendula lumbiko bathe iZEC kumele iveze ubufakazi obugcweleyo bokuthi ngempela abantu laba bayaphila.
Omunye wabo ngocubungula ezombusazwe uMnu Difa Dube yena othe njengogatsha oluvele lungathenjwa ngabanengi abathi lusetshenziswa yiZanu PF ukuqilibezela kukhetho, iZEC ilomlandu wokusuthisa abantu ngokuveza ubufakazi balokhu.
Your browser doesn’t support HTML5
Ingxoxo loMnu Difa Dube