WASHINGTON DC - Ibandla leZanu PF lithi amalunga alo ahlaselwe ngabasekeli bamabandla aphikisayo eNjube, koBulawayo, ngoMvulo ekuseni atshaywa ngamatshe lamarekeni ngesikhathi ekhankasela ukhetho lwamaby-elections oluzakwenziwa mhlaka 26 ngenyanga ezayo.
Usikomitshi walelibandla uMnu Mike Bimha utshele intathelizindaba eHarare ukuthi abanye babatshayiweyo balimele bahanjiswa esibhedlela. Wengeze wathi ibandla lakhe limangale loludaba emapholiseni.
Ebuzwa ukuthi ngabaliphi ibandla kahle-kahle abatshaye amalunga eZanu PF, uBimha uthe bebengakabi leqiniso; kodwa uthe abakwazi mhlophe yikuthi bahlaselwe ngabamabandla aphikisayo.
Your browser doesn’t support HTML5
Amazwi kaMnu Mike Bimha
Umqondisi obona ngokwethulwa kwembiko kuZanu PF uMnu Tafadzwa Mugwadi utshele ilumsakazo ngemva kwalokhu ukuthi besebethole ubufakazo bokuthi bahlaselwe ngabasekeli bebandla likaMnu Nelson Chamisa eleCitizens Coalition for Change (CCC).
Ekhuluma phezu kodaba olufanayo, isikhulumeli seZanu PF uMnu Chris Mutswanga uthe kuyadanisa ukuthi udlakela lolu lwenzakele lanxa nje uMongameli Emmerson Mnangagwa ekhuthaze ukuthula emhlanganweni awenze ngoMgqibelo.
Isikhulumeli seCCC koBulawayo uMnu Swithern Chiroodza utshele iStudio 7 ukuthi ayisibo ababangele loludlakela njalo uthe banakanela ukuthi abasekeli beZanu PF batshayene bona bodwa.
Your browser doesn’t support HTML5
Ingxoxo loMnu Swithern Chiroodza