WASHINGTON - UMongameli Emmerson Mnangagwa usungule umkhankaso wokudingela ibandla leZanu PF usekelo kukhetho lwamaby-elections ngoMgqibelo ngokuxwayisa abantu ukuthi bengalokothi bavotele amakhansila amabandla aphikisayo afana lelikaMnu Nelson Chamisa ngoba eyizikhohlakali.
Ephawula lumkhankaso eEpworth, eHarare, uMnangagwa uthe uzulu engayengwa nguChamisa leCitizens Coalition for Change (CCC) yakhe ngoba sebekuvezile sobala ukuthi abakwenelisayo yokuntshontsha imali yekhansili kuphela besehluleka ukuqhuba inhlelo ezibalulekileyo ezifana lokulungisa imigwaqo, ukubutha izibi lokwekela ingcekeza yezambuzi igeleza ndawana yokhe emadolobheni.
Ukhuthaze njalo abasekeli beZanu PF ukuthi bephilisane kuhle ngokuthula njalo bengaze baphatheka kundaba zodlakela.
“Isibongo seZanu PF kusukeya phansi kusiya phezulu, yikuthula, ukuzwisisana lokubambana. Yiyo insika yeZanu PF. Sithi phansi ngodlakela,” kutsho uMnangagwa.
“Akube lokuthula ekuseni, ukuthula emini, ukuthula ntambama lasebusuku. Ukubambana ekuseni, emini, ntambama lasebusuku. Uthando ekuseni, emini, ntambama, ebusuku’ siyazwana, ye uthando ebusuku.”
UMnangagwa uzitshaye njalo isifuba esithi zinengi inhlelo ezithuthukisa uzulu asezifezile selokhe engene embusweni ezifana lokutholisa uzulu wakoBulawayo amanzi lokulungisa imigwalo.
“Kudaba lwamanzi khonapha eHarare, sakha edamu. KoBulawayo eminyakeni edluleyo, iBulawayo ibihlupheka ngokusilela kwamanzi,” uqhubeka esitsho uMnangagwa.
“Kwathi sokungena uhulumende weSecond Republic sahamba eNyamandlovu sagebha imigodi kulwandle oluphansi, iaquiffer, lapho esidonsa khona amanzi esiya koBulawayo.
“Sehlisa udubo lwamanzi kulelidolobho. Khathesi siphezu kokwakha iGawayi Shangani Dam lapho esizadonsa futhi amanzi esiya koBulawayo,” uthembisile uMnangagwa phambi kwenkulungwane zabasekeli beZanu PF.
Ukuvumile njalo uMnangagwa ukuthi kube lokulwisana phakathi kwamalunga ebandla lakhe ngesikhathi ekhetha abazancintisa kumaby-elections, wona azakwenziwa mhlaka 26 ngenyanga ezayo.
Ngokunjalo, uthe ukulwisana lokhu kumele kuphele njalo labo abanqotshwayo bamukele impumele yokhetho lwama-primary ngoba luveza intando yabasekeli beZanu PF.
Isikhulumeli sebandla leCCC uNkosazana Fadzai Mahere yena utshele iStudio 7 ukuthi uMnangagwa uyalahleka ngokuchothoza ibandla lakhe lokuthembisa abantu ize.
Uthi ubufakazi bokudilika komnotho lokwehluleka kombuso weZanu PF bugcwele ndawo yonke njalo abundingwa.
