BULAWAYO – Umsekeli kaMnu Nelson Chamisa kuCitizens Coalition for Change (CCC), uMnu Welshman Ncube, usesole ukudlephana okukubandla lakhe koBulawayo lapho okubangwa ukuthi ngobani abazancintisa kukhetho lokudinga amakhansila kwezinye indawo.
Ukulwisana lokhu kubikwa kukuWard 26 lakuWard 9. Inkokheli yeCCC ike yazisa kunsukwana ezedluleyo ukuthi abanye ababebhalisile basebevumile ukuma eceleni badedele abanye.
Kodwa lokho kukhanka kungayisilo qiniso nanku ukudonselana kuya phambili kulelidolobho.
“Kulesikhundla esisodwa esikakhansila, esesibili ngesikaMP. Kambe lonke selingadlephana ngezikhundla zonezi zombili kuphela. Injongo yethu sokuyikudinga izikhundla?,” kubuze uNcube emhlanganweni wokukhanksela ilunga lebandla lakhe uMnu Edwin Ndlovu, yena ofuna ukuba ngukhansila kaWard 8.
UNcube ukhuthaze abantu ukuthi bavotele ibandla lakhe ukuze baqede ukuhlupheka athi sokulethwe nguMongameli Emmerson Mnangagwa lebandla lakhe leZanu PF.
Abasiki bebunda bathi ukulwisana kuCCC lokhu sokwehlukanise amaShona lamaNdebele koBulawayo. Isiphathamandla salelibandla uMnu Amos Chibaya ubemele ayebhula umlilo ngoMgqibelo kodwa kasahambanga.
UNdlovu utshele iStudio 7 ukuthi kuWard yakhe akulakudlephana okukhona. Ngakho, uthe ukhangelele ukunqoba ngoba abantu bakulindawo bengawuthakazeleli umbuso weZanu PF.
Your browser doesn’t support HTML5
Ingxoxo loMnu Edwin Ndlovu
Abanengi koBulawayo bayakusola kakhulu ukuncintisa kwamalunga eCCC emabili kuWard inye besithi lokhu kuzanika iZanu PF ithuba lokunqoba, kubike intathelizindaba yeStudio 7 uEzra Tshisa Sibanda.
Your browser doesn’t support HTML5
Udaba Siluphiwa nguEzra Tshisa Sibanda