Zithithibele intathelizindaba ezisakhulayo kulandela ukubotshwa kuka Blessed Mhlanga osebenza kuphephandaba leNewsDay leHeart and Soul TV, owetheswa icala lokusabalalisa indaba uhulumende athi zilakho ukutshotshozela udlakela.
UMhlanga owaxoxa lowalwa impi yenkululeko uMnu. Blessed Geza ngodaba lombuso kaMongameli Emmerson Mnangagwa, useleviki evalelwe esitokisini seRemand Prison eHarare kulandela ukwalelwa ukuba ahlawule imali yesibambiso, i-bail.
UGeza watshela uMhlanga ukuba sokumele uMnangagwa asuke embusweni ngoba seyehluleke ukubusa eleZimbabwe. UGeza ngomunye wabaphikisa labo abathi uMnangagwa kumele aqhubeke esembusweni kungafika umnyaka ka2028 lapho okugqitshwa khona amahlandla amabili ombuso wakhe.
Omunye wabethuswe yikubotshwa kuka Mhlanga nguLeopold Munhende, okhokhela inhlanganiso yentathelizindaba yabasakhulayo eyeYoung Journalists Association.
“Ukubotshwa kuka Blessed kwenza ukuba sehluleke ukwenza umsebenzi wethu sikhululekile njenge ntatheli ezisakhulayo ngoba akula cala alenzayo ngaphandle kokwenza umsebenzi wakhe.”
Wethukile loKovedzai Takawira. ‘’Nxa uMhlanga olodubo kangaka evalelwa ejele pho thina esisakhulayo sizakwenelisa na ukusebenza kusimo esikiso lesi. Ngabe bayakukhangela lokhu ngoba sesisebesa umsebenzi.”
UGracious Nyathi osebenzela umsakazo weMagamba TV laye uthi indlela uMhlanga aphethwe ngayo iyamethusa.
“Sesihlalela evalweni ngoba akula okunye esikwanziyo ngaphandle kokuthapha izindaba, Ukubotshwa lokhu kwenza singakhulumi ezinye indaba ezinkulu.”
Uhulumende uthi uMhlanga wephula iziqondiso zomthetho weCriminal Law (Codification and Reform) Act kungxoxo azenza loGeza mhlaka 27 ngoZibandlela lamhlaka 11 kulinyanga.
Okhokhela inhlanganiso yeZimbabwe Union of Journalists, uMnu. Perfect Hlongwane, uthi okwenzakala kuMhlanga kuphazamisa intathelizindaba.
“Lokhu abakwenzayo sikubona njengendlela yokwethusela abasakhulayo okuzakwenza bengenzi umsebenzi wabo ngemfanelo. Kumele uhulumende akukhangelisise.”
Kodwa umphathintambo kahulumende obona ngokukhitshwa kwemibiki, uMnu. Jenfan Muswere, uthi intathelizindaba akumelanga zethuke ngoba uMhlanga wephula umthetho.
“Inkululeko loba imvumo yokukhuluma elikufunayo isekelwa yisisekelo sombuso. Kungakho akumelanga lesabe lutho njenge ntatheli. Ngikhuthaza intatheli ukuba zenze umsebenzi wazo ngemfanelo zingephuli umthetho.”
Amagqwetha kaMhlanga athi aphakathi kokulungiselela ukukhweza udaba lwakhe enkantolo yeHigh Court, ephikisa isinqumo sikamantshi esokwala ukumkhulula ngemali yesibambiso, i-bail.
Forum