Intathelizindaba yephephandaba leNewsDay lomsakazo kamabonakude oweHSTV uBlessed Mhlanga umiswe enkantolo ngoLwesibili esetheswa amacala amabili okwethula imbiko ephehla udlakela, njalo abatshutshisi balile ukuthi akhululwe ngemali yesibambiso, i-bail, ngoba besithi ulakho ukuphazamisa abafakazi.
UMhlanga ubotshwe ngoMvulo ngemva kokuzinikela enkambeni yeHarare Central Police Station wavulelwa amacala lawa phansi komthetho weCriminal Law (Codification and Reform) Act.
Amapholisa athi watshotshozela udlakela kungxoxo azenze kunsukwana ezedluleyo lelunga leZanu PF Central Committee uMnu Blessed Geza, yena okhokhela abalwa impi yenkululeko abathi kumele uMongameli Emmerson Mnangagwa asuke embusweni ngoba ekhohlakele.
Igqwetha likaMhlanga uMnu Chris Mhike usole abatshutshisi ngokuphikisa isicelo sokuthi akhululwe nge-bail, esithi le yindlela yokumhlukuluza nje kuphela.
UMhike utshele umthethwandaba njalo ukuthi uyakusola ukuphathwa kwecala likaMhlanga lipholisa elikhangelane lamacala ezikliwi eziyingozi, i-terrorism.
UMhlanga uzaqhubeka evalewe abesephenduka enkantolo ngoLwesine lapho umantshi uMnu Farai Gwitima athe uzakwethula isinqumo phezu kwesicelo sakhe sokuthi akhululwe nge-bail.
Kulabantu abanengi abahambe enkantolo ukuyasekela uMhlanga, abagoqela abalwela amalungelo oluntu, abezombusazwe, amagqwetha kanye labantu makhaza.
Abanye babo babalisa owake waba ngumphathintambo wezemali njalo eligqwetha uMnu Tendai Biti, umkhokheli webandla leTransform Zimbabwe uMnu Jacob Ngarivhume loMnu Lovemore Madhuku okhokhela ibandla leNCA.
Umqondisi wenhlanganiso yezindaba eyeCITE uMnu Zenzele Ndebele, yena ehlaziya ezombusazwe, utshele iStudio 7 ukuthi bayakusola okwenzakala kuMhlanga.
Forum